କଟକ: ଆଜି ଶିଶୁ ଭବନରେ ୫ଜଣ ଶିଶୁଙ୍କ ମୃତ୍ୟୁ ଘଟିଛି । ଏହାକୁ ମିଶାଇ ଶିଶୁ ଭବନରେ ଶିଶୁମୃତ୍ୟୁ ସଂଖ୍ୟା ୫୯ରେ ପହଞ୍ଚିଛି । ଆଜି ପୁରୀ, ଖୋର୍ଦ୍ଧା, ଖଣ୍ଡଗିରି, ଚଣ୍ଡିଖୋଲ ଓ ସିଡିଏ ଅଞ୍ଚଳର ୫ଜଣ ଶିଶୁଙ୍କର ମୃତ୍ୟୁ ଘଟିଛି । ସେପଟେ ଶିଶୁମୃତ୍ୟୁ ଘଟଣାରେ ଶିଶୁ ଭବନରେ ୬ଜଣ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ବିଭାଗୀୟ ତଦନ୍ତ ପରେ ଶିଶୁ ଭବନ କର୍ମଚାରୀଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି । ଦୁଇଜଣ ଷ୍ଟାଫ ନର୍ସ ଓ ୩ଜଣ ଆଟେନାଣ୍ଟ ନିଲମ୍ବନ କରାଯାଇଛି । ସେହିପରି ଅନ୍ୟ ଦୁଇ ଷ୍ଟାଫନର୍ସଙ୍କୁ ଶିଶୁ ଭବନରୁ ଅନ୍ୟତ୍ର ବଦଳି କରାଯାଇଛି । ୩ଜଣ ଆଟେନାଣ୍ଟଙ୍କ ନାମରେ ମାମଲା ରୁଜୁ କରାଯାଇଛି । ଚିକିତ୍ସା ସୁବିଧା ଲାଗି ଶିଶୁ ଭବନରେ ୭ଜଣ ବରିଷ୍ଠ ରେସିଡେଣ୍ଟ ଡାକ୍ତରଙ୍କୁ ନିଯୁକ୍ତି ଦିଆଯାଇଥିବା ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି ।
ଅନ୍ୟପକ୍ଷେ ଶିଶୁଭବନରେ ତଦନ୍ତ କରିଥିବା କେନ୍ଦ୍ରୀୟ ଟିମ ତାର ରିପୋର୍ଟ ପ୍ରଦାନ କରିଛି । ରିପୋର୍ଟରେ ଶିଶୁଭବନରେ ବଢି ଚାଲିଥିବା ଶିଶୁମୃତ୍ୟୁ ପାଇଁ ଭିତ୍ତିଭୂମି ଓ ଷ୍ଟାଫ୍ ଅଭାବକୁ ମୁଖ୍ୟତଃ ଦାୟୀ କରିଛି କେନ୍ଦ୍ରୀୟ ଟିମ୍। କେନ୍ଦ୍ରୀୟ ଟିମ ସ୍ୱାସ୍ଥ୍ୟ ମନ୍ତ୍ରାଳୟକୁ ଦେଇଥିବା ରିପୋର୍ଟରେ ସଂକ୍ରମଣ ରୋକିବା ଲାଗି ବ୍ୟବସ୍ଥା ଓ ଆଇସିୟୁରେ ଶଯ୍ୟା ଅଭାବ ଥିବା ଦର୍ଶାଇଛି। ଆଜି ଦିଲ୍ଲୀରୁ ଏକ ୬ ଜଣିଆ ଶିଶୁରୋଗ ବିଶେଷଜ୍ଞ ଦଳ କଟକରେ ପହଞ୍ଚିଛନ୍ତି।
ଶିଶୁ ଭବନରେ ଉଦବେଗଜନକ ଭାବେ ଶିଶୁମୃତ୍ୟୁ ସଂଖ୍ୟା ବଢ଼ିବାର କାରଣ ସମ୍ପର୍କରେ କଟକ ଆସିଥିବା ୭ ଜଣିଆ କେନ୍ଦ୍ରୀୟ ଟିମ୍ ସ୍ୱାସ୍ଥ୍ୟ ମନ୍ତ୍ରାଳୟକୁ ରିପୋର୍ଟ ପ୍ରଦାନ କରିଛି। ଏକ ଇଂରାଜୀ ଦୈନିକରେ ପ୍ରକାଶ ପାଇଥିବା ଖବର ଅନୁୟାୟୀ, ରିପୋର୍ଟରେ ଶିଶୁମୃତ୍ୟୁ ପାଇଁ ଭିତ୍ତିଭୂମିର ଅଭାବ, କମ୍ ସଂଖ୍ୟକ ଷ୍ଟାଫ୍ ଓ ପରିମଳ ବ୍ୟବସ୍ଥାକୁ ଦାୟୀ କରାଯାଇଛି। ହସ୍ପିଟାଲରେ ସଂକ୍ରମଣ ରୋକିବା ଲାଗି ଆବଶ୍ୟକ ବ୍ୟବସ୍ଥାର ଅଭାବଥିବା ରିପୋର୍ଟରେ କୁହାଯାଇଛି। ସେହିପରି ହସ୍ପିଟାଲରେ ଉଚ୍ଚମାନର ଆଣ୍ଟିବାୟୋଟିକ୍ସ ଓ ଜୀବନ ରକ୍ଷାକାରୀ ଔଷଧ, ଇନ୍ଫ୍ୟୁଜନ ପମ୍ପ, ପଲ୍ସ ଅକ୍ଜିମିଟର ଭଳି ଆବଶ୍ୟକ ଯନ୍ତ୍ରାଂଶର ଅଭାବ ଥିବା ଉଲ୍ଲେଖ କରାଯାଇଛି। ରିପୋର୍ଟରେ ଆହୁରି କୁହାଯାଇଛି ଯେ, କେବଳ ୪୦ ପ୍ରତିଶତ ଶିଶୁଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା। ଅଧିକାଂଶ କ୍ଷେତ୍ରରେ ଶଯ୍ୟା ଅଭାବ ଓ ଅନ୍ୟ କାରଣରୁ ରୋଗୀକୁ ଆଡମିଟ୍ କରିବାରେ ୪ରୁ ୫ ଘଣ୍ଟା ବିଳମ୍ୱ ହୋଇଥିଲା। ଯଦିଓ ଚିକିତ୍ସା ପ୍ରଣାଳୀ ଠିକ୍ ଥିଲା ତେବେ ଡାକ୍ତର ଓ ନର୍ସଙ୍କ ଦ୍ୱାରା ରୋଗୀଙ୍କ ଯେଭଳି ନିରୀକ୍ଷଣ ହେବା କଥା ତାହା ହୋଇ ନ ଥିବା କୁହାଯାଇଛି। ସେହିପରି ଡାକ୍ତର ରୋଗୀଙ୍କୁ ପରୀକ୍ଷା କରିଥିଲେ ମଧ୍ୟ କେଉଁ ଚିକିତ୍ସା ଲାଗି ପରାମର୍ଶ ଦେଇଥିଲେ ତାହା ରୋଗୀଙ୍କ କେସ୍ ସିଟରେ ଉଲ୍ଲେଖ ନ ଥିଲା। ସେହିପରି ଅଧିକାଂଶ କ୍ଷେତ୍ରରେ ରୋଗୀଙ୍କ ବିଭିନ୍ନ ଟେଷ୍ଟର ରିପୋର୍ଟ ମଧ୍ୟ ସନ୍ତୋଷଜନକ ନ ଥିବା କୁହାଯାଇଛି। ରିପୋର୍ଟ ଆସିବା ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ରାଜ୍ୟ ସରକାର ଚାହିଁଲେ କେନ୍ଦ୍ର ସବୁ ପ୍ରକାର ସହାୟତା ଯୋଗଇ ଦିଆଯିବ । ସେପଟେ ଦିଲ୍ଲୀରୁ ଏକ ୬ ଜଣିଆ ଶିଶୁରୋଗ ବିଶେଷଜ୍ଞଙ୍କ ଟିମ୍ ଆଜି ଶିଶୁ ଭବନରେ ପହଞ୍ଚିଛନ୍ତି। ଏହି ଟିମ୍ ଏଠାରେ ୧୫ ଦିନ ଧରି ରହିବା ସହ ସ୍ୱାସ୍ଥ୍ୟସେବାର ସହଯୋଗ କରିବେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
