ବ୍ଲୁ-ହ୍ୱେଲ୍‌ ପଞ୍ଝାରେ ନର୍ସିଂ ଛାତ୍ରୀ ! ନିଶା ବଟିକା ଖାଇ ମେଡ଼ିକାଲରେ ଭର୍ତ୍ତି

ଝରସୁଗୁଡ଼ା(ଓଡ଼ିଶା ରିପୋର୍ଟର): ବ୍ଲୁ ହ୍ୱେଲ୍‌ ଗେମ୍‌ ଦିନକୁ ଦିନ କାୟା ବିସ୍ତାର କରିବାରେ ଲାଗିଛି। କଟକ ପରେ ଝାରସୁଗୁଡ଼ାରେ ଜଣେ ନିର୍ସିଂ ଛାତ୍ରୀ ଏହି ଗେମ୍‌ ଖେଳି ଆତ୍ମହତ୍ୟା ଉଦ୍ୟମ କରୁଥିବା ଅଭିଯୋଗ ହୋଇଛି। ବେଲପାହାଡ଼ ପୋଲିସ ଘଟଣାର ତଦନ୍ତ ଆରମ୍ଭ କରିଛି।

ଝାରସୁଗୁଡ଼ା ଜିଲ୍ଲା ଲଖନପୁର ଅଞ୍ଚଳର ଏକ ବେସରକାରୀ ନର୍ସିଂ କଲେଜ ଛାତ୍ର ଜଣକ ପାଠ ପଢ଼ନ୍ତି। ଦୁର୍ଗା ପୂଜା ଛୁଟି ଯୋଗୁଁ ଗତକାଲି ସେ ଘରକୁ ଯାଇଥିଲେ। ଆଜି ସକାଳେ ନିଶା ବଟିକା ଖାଇବା ସହିତ ବ୍ଲେଡ୍‌ରେ ହାତ କାଟି ଦେଥିଲେ। ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମେଡ଼ିକାଲରେ ଭର୍ତ୍ତି କରିଥିଲେ। ଏବେ ମଧ୍ୟ ଛାତ୍ରୀଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ରହିଛି। ଛାତ୍ରୀ ଜଣକ ବ୍ଲୁ ହ୍ୱେଲ ଗେମ୍‌ ଖେଳୁଥିବା ସନ୍ଦେହ କରାଯାଉଛି।

ବ୍ଲୁ ହ୍ୱେଲ୍‌ ନଖେଳିବା ପାଇଁ ବ୍ୟାପକ ସଚେତନତା କରାଯାଉଛି। ସ୍କୁଲ ଓ କଲେଜରେ ଅଧ୍ୟୟନ କରୁଥିବା ଛାତ୍ରଛାତ୍ରୀଙ୍କ ଆଚରଣ ଉପରେ ସନ୍ଦେହ ହେଲେ କର୍ତ୍ତୃପକ୍ଷ ସେମାନଙ୍କ ଅଭିଭାବକଙ୍କୁ ଅବକତ କରାଇବାକୁ ପରାମର୍ଶ ଦିଆଯାଇଥିଲା। ଏପରିକି ଆବଶ୍ୟକ ପଡ଼ିଲେ ପୋଲିସର ସହାୟତା ନେବାକୁ କୁହାଯାଇଥିଲା। ଏହା ସତ୍ତ୍ୱେ ଛାତ୍ରଛାତ୍ରୀମାନେ ଏହି ଘାତକ ଗେମ୍‌ ବ୍ଲୁ ହ୍ୱେଲ ପଞ୍ଝାରୁ ବାହାରି ପାରୁ ନାହାନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।