ଭୁବନେଶ୍ୱର: ତ୍ରାହି ଅଚ୍ୟୁତ ଆଶ୍ରମ ମାମଲାର ତଦନ୍ତ କ୍ରାଇମବ୍ରାଞ୍ଚ କରିବ । ଏଥିପାଇଁ ମଙ୍ଗଳବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ରାଇମବ୍ରାଞ୍ଚକୁ ନିର୍ଦ୍ଦେଶ ଦେଇଛନ୍ତି । କ୍ରାଇମବ୍ରାଞ୍ଚ ଏଡିଜି ବି.କେ. ଶର୍ମା କହିଛନ୍ତି ଯେ, ତ୍ରାହି ଅଚ୍ୟୁତ ଆଶ୍ରମର ସୁରବାବା ଓ ତାଙ୍କ ଦୁଇ ପୁଅଙ୍କ ନାମରେ ୪ଟି ମାମଲା ରୁଜୁ ହୋଇଛି । ଏହାର ତଦନ୍ତ ପାଇଁ କ୍ରାଇମବ୍ରାଞ୍ଚ ୪ଟି ଟିମ ଗଠନ କରିଛି । ଆବଶ୍ୟକ ପଡିଲେ ଅଧିକ ଟିମ ଗଠନ କରାଯିବ ବୋଲି ଏଡିଜି ଶର୍ମା କହିଛନ୍ତି । କ୍ରାଇମବ୍ରାଞ୍ଚ ଆଇଜି ଅରୁଣ ବୋଥ୍ରା ପୋଲିସ କମିଶନରେଟଙ୍କୁ ଭେଟି ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି । ଅନ୍ୟପକ୍ଷେ ଆଶ୍ରମ ପରିସରରେ ଥିବା ସୁରବାବାଙ୍କୁ ବାସଭବନରେ ପୋଲିସ ପକ୍ଷରୁ ସର୍ଚ୍ଚ ଅପରେସନ କରାଯାଉଛି । ଅତିରିକ୍ତ ଡିପିସିଙ୍କ ନେତୃତ୍ୱରେ ପୋଲିସ ଟିମ ସୁରବାବାଙ୍କ ଘରେ ଏହି ସର୍ଚ୍ଚ ଚଳାଇଛନ୍ତି । ସେପଟେ କମିଶନରେଟ ପୋଲିସ ସୁରବାବା ଓ ତାଙ୍କ ଦୁଇ ପୁଅଙ୍କୁ ୩ଦିନିଆ ରିମାଣ୍ଡରେ ନେଇଛି । କମିଶନରେଟ ପୋଲିସ ଏଥିପାଇଁ ଜେଏମଏଫସିଙ୍କଠାରେ ଆବେଦନ କରିଥିଲା ।
ତ୍ରାହି ଅଚ୍ୟୁତ ଆଶ୍ରମ କର୍ତ୍ତୃପକ୍ଷ ସରକାରୀ ଜମି ଜବରଦଖଲ କରିଥିବାକୁ ନେଇ ବିବାଦ ଦେଖା ଦେଇଥିଲା । ଆଳୁ ଖୋଳୁ ଖୋଳୁ ମହାଦେବ ବାହାରିବା ଭଳି ଏହି ଘଟଣା ପଛକୁ ପଛ ଆଶ୍ରାମର ସୁରବାବାଙ୍କ ନାମରେ ହତ୍ୟା, ମହିଳାଙ୍କୁ ଯୌନ ନିର୍ଯାତନା ଦିଆଯିବା ଓ ଗୁଣ୍ଡା ରଖି ଜୋରଜବରଦସ୍ତ ଜମି ହଡପ କରିବା ଭଳି ଅଭିଯୋଗ ଆସିଛି । ଏହାକୁ ନେଇ ବାଲିପାଟଣା ଝିଇଣ୍ଟି ନିକଟରେ ଥିବା ସୁରବାବାଙ୍କ ତ୍ରାହି ଅଚ୍ୟୁତ ଆଶ୍ରମ ପରସରରେ ଉତ୍ତେଜନା ପ୍ରକାଶ ପାଇଥିଲା । ଉତ୍ତ୍ୟକ୍ତ ଲୋକେ ଶନିବାର ରାତିରେ ଆଶ୍ରମ ମଧ୍ୟରେ ଧସେଇ ପଶି ବ୍ୟାପକ ଭଙ୍ଗାରୁଜା କରିବା ସହ ୧୫ରୁ ଅଧିକ ଗାଡି ପୋଡି ଦେଇଥିଲେ । ସ୍ଥିତି ଅସମ୍ଭାଳ ହେବାରୁ ଆଶ୍ରମ ପରିସରରେ ବ୍ୟାପ ପୋଲିସ ମୁତୟନ ହୋଇଥିଲେ । ହେଲେ ରବିବାର ମଧ୍ୟ ସ୍ଥିତିରେ ସୁଧାର ଆସି ନ ଥିଲା । ରବିବାର ସୁରବାବାଙ୍କୁ ପୋଲିସ ଗିରଫ କରିବା ସତ୍ତ୍ୱେ ଆଶ୍ରମ ଅଞ୍ଚଳରେ ଉତ୍ତେଜନା ପ୍ରଶମିତ ହୋଇ ନ ଥିଲା । ଉତ୍ତ୍ୟକ୍ତ ଲୋକେ ପୋଲିସ ଉପରକୁ ଢେଲା ମାଡ କରିବା ସହ ଆଶ୍ରମକୁ ସମ୍ପୂର୍ଣ୍ଣ ଭାଙ୍ଗିବାକୁ ଦାବି କରିଥିଲେ । ପୋଲିସ ପକ୍ଷରୁ ଉତ୍ତ୍ୟକ୍ତ ଲୋକଙ୍କୁ ଘଉଡାଇବାକୁ ଲୁହ ବୁହା ଗ୍ୟାସ ପ୍ରୟୋଗ କରାଯାଇଥିଲା । ପରେ ପୋଲିସ ପ୍ରଶାସନ ପକ୍ଷରୁ ଲୋକଙ୍କୁ ଶାନ୍ତିଶୃଙ୍ଖଳା ରକ୍ଷା ଲାଗି ମାଇକ ଦ୍ୱାରା ନିବେଦନ କରାଯାଇଥିଲା। ଶେଷରେ ସ୍ଥାନୀୟ ୫ଟି ପଞ୍ଚାୟତର ବୟୋଜେଷ୍ଠ ବ୍ୟକ୍ତିଙ୍କୁ ନେଇ ଏକ ଶାନ୍ତି କମିଟି ଗଠନ କରାଯିବା ପରେ ପରିସ୍ଥିତି ଶାନ୍ତ ପଡିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
