ଜିଏସଟି ବିଲକୁ ବିଜେଡିର ସମର୍ଥନ

ଭୁବନେଶ୍ୱର: ଗୁରୁତ୍ୱପୂର୍ଣ୍ଣ ଗୁଡସ୍ ଆଣ୍ଡ୍ ସର୍ଭିସ୍ ଟାକ୍ସ ବା ଜିଏସଟି ବିଲକୁ ବିଜେଡି ଦୃଢ ସମର୍ଥନ କରିଛି। ଏଇ ବିଲ୍ ଆଇନରେ ପରିଣତ ହେଲେ ଉଭୟ କେନ୍ଦ୍ର ଓ ରାଜ୍ୟ ଲାଭବାନ ହେବେ। ଭୁବନେଶ୍ୱରରେ ଆୟୋଜିତ ବିଜନେସ୍ ଷ୍ଟାଣ୍ଡାର୍ଡର ଓଡ଼ିଶା ରାଉଣ୍ଡ ଟେବୁଲ-୨୦୧୫ କାର୍ଯ୍ୟକ୍ରମରେ ରବିବାର ଯୋଗଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।

ରାଜ୍ୟରେ ଶିଳ୍ପ ପ୍ରତିଷ୍ଠାକୁ ସହଜ କରିବା ପାଇଁ ପଦକ୍ଷେପ ନିଆଯାଉଛି। ଏହି କ୍ରମରେ ଆସନ୍ତା ୨ରୁ ୩ ମାସ ମଧ୍ୟରେ ଅନଲାଇନ୍ କମ୍ୱାଇନଡ ଆପ୍ଲିକେସନ ଫର୍ମ ବ୍ୟବସ୍ଥା ଆରମ୍ଭ ହେବ। ଏହା ମାଧ୍ୟମରେ ନୂଆ ବ୍ୟବସାୟ ପାଇଁ ବିଭିନ୍ନ ଅନୁମତି ଓ ମଞ୍ଜୁରୀ ଅନଲାଇନରେ ମିଳିପାରିବ ବୋଲି ମୁଖ୍ୟମନ୍ତ୍ରୀ ତାଙ୍କ ବକ୍ତବ୍ୟରେ କହିଥିଲେ।

ସେହିଭଳି ଓଡ଼ିଶାରେ ପୋସ୍କୋ ହେବା ନେଇ ରାଜ୍ୟ ସରକାର ଆଶାବାଦୀ ବୋଲି ମୁଖ୍ୟମନ୍ତ୍ରୀ କହିଛନ୍ତି। ସମସ୍ୟାର ସମାଧାନ ପାଇଁ କେନ୍ଦ୍ର ସରକାରଙ୍କ ସ୍ତରରେ ଏକ ବୈଠକ କରିବା ପାଇଁ କୁହାଯାଇଛି। ଏ ନେଇ ପ୍ରଧାନମନ୍ତ୍ରୀଙ୍କୁ ମଧ୍ୟ ଅବଗତ କରାଯାଇଥିବା ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି। ପୋଲାଭରମ, ମରୁଡ଼ି ସହାୟତା ଓ ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରସଙ୍ଗରେ ଓଡ଼ିଶା ପାଇଁ ଯାହା ଭଲ ହେବ ତାହା କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଆଗାମୀ ତିନିବର୍ଷରେ ବିଭିନ୍ନ କ୍ଷେତ୍ରରେ ରାଜ୍ୟରେ ୧ ଲକ୍ଷ ୭୦ ହଜାର କୋଟି ଟଙ୍କାର ପୁଞ୍ଜି ବିନିଯୋଗର ଲକ୍ଷ୍ୟ ରଖାଯାଇଛି। ଏହା ମାଧ୍ୟମରେ ସାଢେ ତିନି ଲକ୍ଷ ଯୁବକ ଯୁବତୀଙ୍କୁ ନିଯୁକ୍ତି ସୁଯୋଗ ଦିଆଯିବ।