ନୂଆଦିଲ୍ଲୀ: ଶେଷରେ ଅର୍ଥ ମନ୍ତ୍ରଣାଳୟ ଓ ବିଭିନ୍ନ ଉଦ୍ୟୋଗଗୁଡ଼ିକର ଦାବିକୁ ମାନି ନେଇଛନ୍ତି ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ)। ରେପୋ ରେଟକୁ ହ୍ରାସ କରିଛନ୍ତି। ମଙ୍ଗଳବାର ଆରବିଆଇ ରେପୋ ରେଟରେ ୨୫ ବେସିସ ପଏଣ୍ଟ ହ୍ରାସ କରିଛନ୍ତି। ଫଳରେ ରେପୋ ରେଟ୍ ୭.୨୫ ରେ ପହଞ୍ଚି ଯାଇଛି। ଏହାକୁ ମିଶାଇ ଚଳିତ ବର୍ଷ ଆରବିଆଇ ତିନି ଥର ରେପୋ ରେଟ୍ କମାଇ ସାରିଲେଣି। ଏହା ପୂର୍ବରୁ ଗତ ଜାନୁଆରୀ ଓ ମାର୍ଚ୍ଚ ମାସରେ ମଧ୍ୟ ଆରବିଆଇ ରେପୋ ରେଟରେ ୨୫ ବେସିସ ପଏଣ୍ଟ ହ୍ରାସ କରିଥିଲେ।
ରେପୋ ରେଟ୍ ହ୍ରାସ କଥା ଘୋଷଣା କରି ଆରବିଆଇ ଗଭର୍ଣ୍ଣର ରଘୁରାମ ରାଜନ କହିଥିଲେ ଯେ ଏଥର ଆଶା ଠାରୁ ଅଧିକ ଭଲ ମୌସୁମୀ ବର୍ଷା ହେଲେ ରେପୋ ରେଟରେ ପୁଣି ଥରେ ହ୍ରାସ କରାଯିବା ନେଇ ସବୁ ପ୍ରକାର ସମ୍ଭାବନା ରହିଛି।
ଆଜି ପୁଣି ଥରେ ରେପୋ ରେଟ୍ ହ୍ରାସ କରାଯାଇଥିବା ଯୋଗୁ ଇଏମଆଇରେ କିଛି ହ୍ରାସ ହେବ ବୋଲି ଆଶା ସଞ୍ଚାର ହୋଇଛି। ଏପରି ହେଲେ ଗୃହ ଋଣ ଓ ଅଟୋ ଋଣ ସୁଧହାର କମି ଯିବ।
ଆରବିଆଇ ଗଭର୍ଣ୍ଣର ରଘୁରାମ ରାଜନ ରେପୋ ରେଟରେ ୨୫ ବେସିସ ପଏଣ୍ଟ ହ୍ରାସ କରିଥିଲେ ହେଁ କ୍ୟାସ୍ ରିଜର୍ଭ ରେସିଓ (ସିଆରଆର) ଓ ଷ୍ଟେଚ୍ୟୁଟରୀ ଲିକ୍ୟୁଡିଟି ରେସିଓ (ଏସଏଲଆର)ରେ କୌଣସି ପରିବର୍ତ୍ତନ କରି ନାହାନ୍ତି। ବ୍ୟାଙ୍କଗୁଡ଼ିକ ଉପରେ ଲାଗୁ ହୋଇଥିବା ସିଆରଆର ୪% ଓ ଏସଏଲଆର ୨୧.୫% ରେ ଅପରିବର୍ତ୍ତିତ ରହିଛି।