ବଲାଙ୍ଗିର: ବଲାଙ୍ଗିର ପୋଲିସ୍ ରୋହିତ ପ୍ରଧାନ ହତ୍ୟା ଘଟଣାରେ ୩ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ କର୍ଲାପିଟା ଗାଁର ଇନ୍ଦ୍ରମଣି ବରାଡ଼ ଓ ତାଙ୍କର ଦୁଇ ପୁଅ ହିମାଂଶୁ ଏବଂ ନରେଶ। ଗିରଫ ପରେ ସେମାନଙ୍କୁ କୋର୍ଟଚାଲାଣ କରାଯାଇଛି। ଏହି ହତ୍ୟାକାଣ୍ଡରେ ଏକାଧିକ ବ୍ୟକ୍ତି ସମ୍ପୃକ୍ତି ଥିବା ସନ୍ଦେହରେ ପୋଲିସ ଖୋଳତାଡ଼ ଆରମ୍ଭ କରିଛି।
ସୂଚନାଯୋଗ୍ୟ, ଜମିଜମାକୁ ନେଇ ପୂର୍ବରୁ ଇନ୍ଦ୍ରମଣି ଓ ରୋହିତଙ୍କ ମଧ୍ୟରେ ବିବାଦ ଲାଗି ରହିଥିଲା। ଏହାଛଡ଼ା ରୋହିତଙ୍କ ଜଣେ ସମ୍ପର୍କୀୟ ରଘୁମଣି ଓ ଗିରଫ ଇନ୍ଦ୍ରମଣି ୱାର୍ଡ଼ ମେମ୍ୱର ଭାବେ ପ୍ରତିଦ୍ୱନ୍ଦିତା କରୁଥିଲେ। ନିର୍ବାଚନରେ ରୋହିତ କଂଗ୍ରେସ ଜିଲ୍ଲା ପରିଷଦ ପ୍ରାର୍ଥୀଙ୍କ ଏଜେଣ୍ଟ ରହିବାକୁ ମନୋନୀତ ହୋଇଥିଲେ। ତେଣୁ ରୋହିତଙ୍କ ହତ୍ୟା ପଛରେ ଜମିଜମା ସହ ରାଜନୈତିକ କାରଣ ଥାଇପାରେ ବୋଲି ପୋଲିସ ସନ୍ଦେହ କରୁଛି।