ବାଲେଶ୍ୱର: ୨ହଜାର ଟଙ୍କା ଲାଞ୍ଚ ନେବା ଅଭିଯୋଗରେ ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକର ମୁଖ୍ୟ କିରାଣି ବୃନ୍ଦାବନ ଦାସ ଭିଜିଲାନ୍ସ ହାତରେ ଧରାପଡିଛନ୍ତି। ଏକ ବିଲ୍ ପାସ କରାଇ ଦେବାକୁ କହି ସେ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀମାନେ ତାଙ୍କୁ ଗିରଫ କରିଛନ୍ତି। ଏଥିସହ ତାଙ୍କ ବାଲେଶ୍ୱର ସ୍ଥିତ ଘର ଉପରେ ମଧ୍ୟ ଚଢାଉ କରାଯାଇଥିଲା।
ସୂଚନାଯୋଗ୍ୟ, ବାଲିଆ ବ୍ଲକର ଗଙ୍ଗାଧର ରାଉଳ ଏକ ରାସ୍ତା କାମ କରିଥିଲେ। ଏହି କାମ ବାବଦକୁ ତାଙ୍କର ୨ ଲକ୍ଷ ଟଙ୍କାର ବିଲ୍ ବକେୟା ଥିଲା। ଟଙ୍କା ଦେଲେ ବିଲ୍ କରାଇ ଦେବେ ବୋଲି ବୃନ୍ଦାବନ କହିଥିଲେ। ଏଥିପାଇଁ ସେ ୨ ହଜାର ଟଙ୍କା ଲାଞ୍ଚ ମାଗିଥିଲେ। ଏ ନେଇ ଗଙ୍ଗାଧର ଭିଜିଲାନ୍ସ ବିଭାଗ ସହ ଯୋଗାଯୋଗ କରିଥିଲେ। ଯୋଜନା ମୁତାବକ ଆଜି ବୃନ୍ଦାବନ, ଗଙ୍ଗାଧରଙ୍କଠାରୁ ଟଙ୍କା ନେଇଥିବା ବେଳେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଅଧିକାରୀମାନେ ଗିରଫ କରିଥିଲେ।