କଟକ: ଭିନ୍ନକ୍ଷମ ମହିଳାଙ୍କୁ ଜିଆର୍‌ପି ପୋଲିସ୍ ମାଡ଼ ମାରିଥିବା ଅଭିଯୋଗ

କଟକ: କଟକ ଜିଆରପି ଥାନା ଅଧିକାରୀ ଜଣେ ଭିନ୍ନକ୍ଷମ ମହିଳାଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି। ଭଦ୍ରକ ଅଞ୍ଚଳର ଫୁଲ ସିଂ ନାମକ ଜଣେ ଭିନ୍ନକ୍ଷମ ମହିଳା ତାଙ୍କ ସ୍ୱାମୀ ଓ ପିଲାମାନଙ୍କ ସହ ଗତ ଶନିବାର ଦିନ  କଟକ ରେଳ ଷ୍ଟେସନ୍‌ରେ ବସିଥିଲେ। ତାଙ୍କର ୧୦ ବର୍ଷର ପୁଅ ଗଣେଶ କିଛି ଖାଦ୍ୟ ଜିନିଷ କିଣିବାକୁ ବାହାରକୁ ଯାଇଥିଲା। ସେହି ସମୟରେ ଜିଆରପି ପୋଲିସ୍‌ ଅପରେସନ୍‌ ମୁସ୍କାନ୍‌ ଆଳରେ ଗଣେଶକୁ ଥାନାକୁ ନେଇ ଯାଇଥିଲା। ଫୁଲ ସିଂ ଥାନାକୁ ଯାଇ ତାଙ୍କ ପୁଅକୁ ଫେରାଇ ଦେବା ପାଇଁ କହିଥିଲେ। ତେବେ ପୋଲିସ୍‌ ଶୁଣି ନ ଥିଲା। ଓଲଟି ଥାନା ଅଧିକାରୀ ତାଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି। ଏହା ପରେ ପୋଲିସ୍ ଗଣେଶକୁ ବସୁନ୍ଧରାକୁ ହସ୍ତାନ୍ତର କରିଥିଲା। ତେବେ ଫୁଲ ବସୁନ୍ଧରାକୁ ଯାଇ ପୁଅକୁ ନ ଫେରାଇଲେ  ଆତ୍ମହତ୍ୟା କରିବ ବୋଲି କହିଥିଲେ। ଏହାପରେ ଏହି ଘଟଣା ଗଣମାଧ୍ୟମ ନଜରକୁ ଆସିଥିଲା। ତେବେ ଏହି ଘଟଣାରେ ଜିଆରପି ପୋଲିସର ପ୍ରତିକ୍ରିୟା ମିଳିପାରିନାହିଁ।