ଜନ୍ମ ପ୍ରମାଣପତ୍ର ଦେବାକୁ ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡିଲେ ଯୁଜୁମୁରା ଡାକ୍ତରଖାନା କିରାଣି

ସମ୍ୱଲପୁର: ଜନ୍ମ ପ୍ରମାଣପତ୍ର ଦେବାକୁ ଜଣେ ବିଧବା ମହିଳାଙ୍କଠାରୁ ୧୪୦୦ ଟଙ୍କା ଲାଞ୍ଚ ନେଉଥିବା ବେଳେ ଯୁଜୁମୁରା ଡାକ୍ତରଖାନାର କିରାଣି କୃଷ୍ଣଚନ୍ଦ୍ର ରଣାଙ୍କୁ ଭିଜିଲାନ୍ସ ବିଭାଗ ପକ୍ଷରୁ ଗିରଫ କରାଯାଇଛି। ଗଡ଼ଲୋଇସିଂହ ଗାଁର ସସ୍ମିତା ସିଂ ତାଙ୍କ ଦୁଇ ଝିଅଙ୍କ ଜନ୍ମ ପ୍ରମାଣପତ୍ର ଆଣିବା ପାଇଁ ଡାକ୍ତରଖାନାର କିରାଣି କୃଷ୍ଣଙ୍କ ପାଖକୁ ଯାଇଥିଲେ। ଏଥିପାଇଁ ୧୪୦୦ ଟଙ୍କା ଦେବାକୁ କିରାଣି ଜଣଙ୍କ ଦାବି କରିଥିଲେ। ଏ ନେଇ ସସ୍ମିତା ଭିଜିଲାନ୍ସ ଅଧିକାରୀଙ୍କୁ ଜଣାଇଥିଲେ। ଯୋଜନା ମୁତାବକ ଆଜି ସସ୍ମିତା ଲାଞ୍ଚ ଟଙ୍କା ନେଇ କୃଷ୍ଣଙ୍କୁ ଦେଇଥିଲେ। ଏହି ସମୟରେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଅଧିକାରୀମାନେ ତାଙ୍କୁ ଧରି ଥିଲେ। ତେବେ ଏହି ସମୟରେ କୃଷ୍ଣ ଲାଞ୍ଚ ଟଙ୍କାକୁ ଝରକା ଦେଇ ବାହାରକୁ ଫିଙ୍ଗି ଦେଇଥିଲେ।

ତେବେ ଏପରି ଅଭିଯୋଗକୁ କିରାଣି କୃଷ୍ଣ ଖଣ୍ଡନ କରିଛନ୍ତି। ତାଙ୍କୁ ଫସାଇବାକୁ ଏପରି କରାଯାଇଥିବା ସେ କହିଛନ୍ତି।

ଭିଜିଲାନ୍ସ ଡିଏସ୍‌ପି ଆର.କେ. ପ୍ରଧାନ କହିଛନ୍ତି, ଅଭିଯୋଗ ପାଇବା ପରେ ଚଢାଉ କରି ତାଙ୍କୁ ଗିରଫ କରିଛୁ। ତାଙ୍କଠାରୁ ରସାୟନ ବୋଳା ଟଙ୍କା ଉଦ୍ଧାର କରାଯାଇଛି।