କଟକ: ଟ୍ରାଫିକ କନଷ୍ଟେବଳଙ୍କୁ ଓକିଲଙ୍କ ମାଡ଼ ଅଭିଯୋଗ, କାର୍ଯ୍ୟାନୁଷ୍ଠାନ ଦାବିରେ ଡିସିପିଙ୍କୁ ଭେଟିଲେ ଶତାଧିକ କନଷ୍ଟେବଳ

କଟକ: କଟକରେ କାର୍ଯ୍ୟରତ ଜଣେ ଟ୍ରାଫିକ କନଷ୍ଟେବଳ ଗୁରୁବାର ଜଣେ ଓକିଲଙ୍କ ମାଡ଼ ମାରିଥିବା ଅଭିଯୋଗ ହୋଇଛି। ଘଟଣାଟି ଘଟିଛି ସତିଚୌରା ଛକରେ। ସକାଳ ପ୍ରାୟ ୧୦ଟା ବେଳେ ସତିଚଉରା ଛକରେ ପ୍ରତାପ ଚନ୍ଦ୍ର ଦଳେଇ ନାମକ ଜଣେ ଟ୍ରାଫିକ କନଷ୍ଟେବଳ ଡିୟୁଟିରେ ଥିବା ସମୟରେ ବାଇକରେ ଆସୁଥିବା ଜଣେ ଓକିଲ ତାଙ୍କ ସହ ବଚସା କରିବା ସହ ମାଡ଼ ମାରିଥିବା ଅଭିଯୋଗ ହୋଇଛି। ଏନେଇ ସମ୍ପୃକ୍ତ ଟ୍ରାଫିକ କନଷ୍ଟେବଳ ମର୍କତ୍ତନଗର ଥାନାରେ ଲିଖିତ ଅଭିଯୋଗ କରିଛନ୍ତି। ଅନ୍ୟପକ୍ଷରେ ଉକ୍ତ ଓକିଲଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଶତାଧିକ ଟ୍ରାଫିକ୍ କନଷ୍ଟେବଳ କଟକ ଡିସିପିଙ୍କୁ ଭେଟିଥିଲେ। ସେପଟେ ଏହି ଘଟଣାରେ ଏକ ମାମଲା ଦାୟର କରାଯାଇ ତଦନ୍ତ କରାଯାଉଛି ଏବଂ ପ୍ରମାଣ ମିଳିଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କଟକ ଡିସିପି କହିଛନ୍ତି।