ଭୁବନେଶ୍ୱର: କଡ଼ା ସୁରକ୍ଷା ମଧ୍ୟରେ ଭୁବନେଶ୍ୱର ଷ୍ଟେଟ୍ ଫରେନ୍ସିକ୍ ସାଇନ୍ସ ଲାବୋରେଟୋରୀରେ ପୁରୀ ଟ୍ରେନ୍ ପୋଡ଼ି ଘଟଣାର ମୁଖ୍ୟ ଅଭିଯୁକ୍ତ ସୁବାସର ଲାଏ ଡିଟେକସନ୍ ଟେଷ୍ଟ କରାଯାଇଛି। ସୋମବାର ଦିନ ୧୦ଟା ୧୫ରେ ଏଠାରେ ପହଞ୍ଚିବା ପରେ ତାକୁ ଲାଏ ଡିଟେକସନ ବିଭାଗକୁ ନିଆଯାଇଥିଲା। ନିର୍ଦ୍ଧାରିତ ପଦ୍ଧତି ମୁତାବକ ସୁବାସକୁ ବିଭିନ୍ନ ପ୍ରଶ୍ନ ପଚରାଯାଇଥିଲା। ପୂର୍ବରୁ ପ୍ରସ୍ତୁତ ରହିଥିବା ୮୯ଟି ପ୍ରଶ୍ନର ଉତ୍ତର ଦେଇଥିଲା ସୁବାସ। ଦୀର୍ଘ ୭ ଘଣ୍ଟା ଧରି ଚାଲିଥିଲା ଏହି ପ୍ରକ୍ରିୟା। ଏହି ଟେଷ୍ଟରୁ ଘଟଣା ସମ୍ପର୍କରେ ସୁବାସଠାରୁ କିଛି ସୁରାକ୍ ମିଳିବା ଆଶା କରାଯାଉଛି। ଏକା ବେଳେ ୩ଟି ଟ୍ରେନରେ କେମିତି ନିଆଁ ଲାଗିଲା, ତାହା ଜାଣିବାକୁ ଉଦ୍ୟମ କରିଥିଲେ ବିଭିନ୍ନ ତଦନ୍ତକାରୀ ସଂସ୍ଥା।
ଏନ୍ଆଇଏଠାରୁ ଆରମ୍ଭ କରି ଖଗଡପୁର ସିଆଇଡି, ହରିଦ୍ୱାର ଓ ଓଡ଼ିଶା ଜିଆରପି ପକ୍ଷରୁ ସୁବାସକୁ ବାରମ୍ୱାର ଜେରା କରାଯାଇଛି। ତେବେ ସୁବାସ ଏମାନଙ୍କ ନିକଟରେ ଭିନ୍ନ ଭିନ୍ନ ବୟାନ ଦେଇଛି। ସେ ସତ କହୁଛି ନା ନାହିଁ, ଜାଣିବା ପାଇଁ ଲାଏ ଡିଟେକସନ୍ ଟେଷ୍ଟ କରାଯାଇଛି। ଏହାଦ୍ୱାରା ତଦନ୍ତ ପ୍ରକ୍ରିୟା ଆଗେଇ ପାରିବ ବୋଲି ଆଶା କରାଯାଉଛି।