ନୂଆଦିଲ୍ଲୀ: ଅଗ୍ନିବୀରଙ୍କ ନିଯୁକ୍ତି ପାଇଁ ପ୍ରକାଶ ପାଇଲା ବିଜ୍ଞପ୍ତି । ଭାରତୀୟ ସ୍ଥଳ ସେନାରେ ଅଗ୍ନିପଥ ଯୋଜନାରେ ଭର୍ତ୍ତି ହେବା ଲାଗି ଜୁଲାଇ ପ୍ରଥମ ସପ୍ତାହରୁ ରେଜିଷ୍ଟ୍ରେସନ ଆରମ୍ଭ ହେବ । ଏ ନେଇ ସ୍ଥଳସେନା ପକ୍ଷରୁ ବିଜ୍ଞପ୍ତି ଜାରି କରାଯାଇଛି । ସ୍ଥଳ ସେନାରେ ଭର୍ତ୍ତି ହେବାର ସବିଶେଷ ତଥ୍ୟ ଖୁବ ଶୀଘ୍ର ସେନାର ଅଫିସିଆଲ ୱେବସାଇଟରେ ଦିଆଯିବ । ତେବେ https://joinindianarmy.nic.in/index.htm ୱେବସାଇଟରେ ଅଗ୍ନିବୀର ନିଯୁକ୍ତି ନେଇ ଆବଶ୍ୟକୀୟ ଯୋଗ୍ୟତା ବିଷୟରେ ଉଲ୍ଲେଖ ରହିଛି ।
ନୋଟିଫିକେସନ୍ ଅନୁଯାୟୀ ଅଗ୍ନିବୀର ଜେନେରାଲ ଡ୍ୟୁଟି, ଅଗ୍ନିବୀର ଟେକ୍ନିକାଲ, ଅଗ୍ନିବୀର ଟେକ୍ନିକାଲ ( ଆଭିଏସନ୍/ ଆମ୍ୟୁନିସନ୍ ଏକଜାମିନର ), ଅଗ୍ନିବୀର ( କ୍ଲର୍କ/ଷ୍ଟୋର କିପର ଟେକ୍ନିକାଲ), ଅଗ୍ନିବୀର ଟ୍ରେଡ୍ସମ୍ୟାନ (୧୦ମ ପାସ୍ ) ଓ ଅଗ୍ନିବୀର ଟ୍ରେଡ୍ସମ୍ୟାନ(୮ମ ପାସ୍) ଲାଗି ବିଜ୍ଞପ୍ତି ପ୍ରକାଶ ପାଇଛି ।
ଅଗ୍ନିବୀର ନିଯୁକ୍ତି ଲାଗି ବୟସ ସୀମା ସର୍ବନିମ୍ନ ୧୭ ବର୍ଷ ୬ ମାସ ହୋଇଥିବା ବେଳେ ସର୍ବାଧିକ ୨୩ ବର୍ଷ ରହିଛି । ତେବେ କେବଳ ୨୦୨୨-୨୩ ବର୍ଷ ପାଇଁ ସର୍ବାଧିକ ବୟସ ସୀମାକୁ ୨ ବର୍ଷ ବୃଦ୍ଧି କରାଯାଇଛି ।
ଅଗ୍ନିବୀର ନିଯୁକ୍ତି ପାଇଁ ଶିକ୍ଷାଗତ ଯୋଗ୍ୟତା
- ଅଗ୍ନିବୀର ଜେନେରାଲ ଡ୍ୟୁଟି ପାଇଁ ପ୍ରାର୍ଥୀ ଦଶମରେ ସର୍ବନିମ୍ନ ୪୫ ପ୍ରତିଶତ ମାର୍କ ରଖିଥିବା ଆବଶ୍ୟକ । ଏପରକି ପ୍ରତି ବିଷୟରେ ସର୍ବନିମ୍ନ ୩୩ ପ୍ରତିଶତ ମାର୍କ ଥିବା ଜରୁରୀ । ସେହିପରି ଗ୍ରେଡିଂ ସିଷ୍ଟମରେ ଆବେନକାରୀ C2 ଗ୍ରେଡରେ ପାସ କରିଥିବା ଦରକାର । ଏବଂ ପ୍ରତି ବିଷୟରେ ଅତି କମରେ D ଗ୍ରେଡ ଅର୍ଥାତ୍ ୩୩ ରୁ ୪୦ ପ୍ରତିଶତ ମାର୍କ ରଖିବା ଜରୁରୀ।
- ଅଗ୍ନିବୀର ଟେକ୍ନିକାଲ ( ଆଭିଏସନ୍/ଆମ୍ୟୁନିସନ୍ ଏକଜାମିନର )ରେ ଭର୍ତ୍ତି ହେବା ପାଇଁ ସର୍ବନିମ୍ନ ଯୋଗ୍ୟତା ଯୁକ୍ତ ଦୁଇ ବିଜ୍ଞାନ ହେବା ଆବଶ୍ୟକ । ଫିଜିକ୍ସ, କେମିଷ୍ଟ୍ରି, ଗଣିତ ଓ ଇଂରାଜୀ ରଖି ଯୁକ୍ତ ଦୁଇ ବିଜ୍ଞାନରେ ଅତି କମରେ ୫୦ ପ୍ରତିଶତ ମାର୍କରେ ପାସ କରିଥିବା ଯୁବକ ଏହି ପଦବୀ ପାଇଁ ଆବେଦନ କରି ପାରିବେ । ଯେ କୌଣସି ସ୍କୁଲ କିମ୍ବା ବୋର୍ଡରୁ ଦ୍ବାଦଶ ପାସ୍ କରିଥିବା ଯୁବକ ଅଗ୍ନିବୀର ପାଇଁ ଆବେଦନ କରିପାରିବେ । ଏପରକି ଆଇଟିଆଇରେ ଅତି କମ୍ରେ ଏକ ବର୍ଷର ପାଠପଢା ଶେଷ କରିଥିବା ଯୁବକ ମଧ୍ୟ ଏହି ପୋଷ୍ଟ ଲାଗି ଆବେଦନ କରିବାକୁ ଯୋଗ୍ୟ ହୋଇ ପାରିବ । ତେବେ ଉକ୍ତ ଆଇଟିଆଇର କୋର୍ସ ବା ପାଠ୍ୟକ୍ରମ NSQF ଲେବୁଲ-୪ କିମ୍ବା ତା’ ଠାରୁ ଅଧିକ ଥିବା ଜରୁରୀ ।
- ଅଗ୍ନିବୀର ( କ୍ଲର୍କ/ଷ୍ଟୋର କିପର ଟେକ୍ନିକାଲ) ପଦବୀ ପାଇଁ ଯେ କୌଣସି ଷ୍ଟ୍ରିମ (କଳା, ବିଜ୍ଞାନ ଓ ବାଣିଜ୍ୟ)ରେ ଦ୍ବାଦଶ ପାସ୍ କରିଥିବା ଛାତ୍ରମାନେ ଆବେଦନ କରି ପାରିବେ । ଏଥିପାଇଁ ସେମାନଙ୍କର ସର୍ବନିମ୍ନ ୬୦ ପ୍ରତିଶତ ମାର୍କ ଥିବା ଜରୁରୀ ଏବଂ ପ୍ରତି ବିଷୟରେ ସର୍ବନିମ୍ନ ୫୦ ପ୍ରତିଶତ ମାର୍କ ଥିବା ଆବଶ୍ୟକ । ଏହା ସହ ଇଂଲିଶ, ଗଣିତ/ଆକାଉଣ୍ଟସ/ବୁକ କିପିଂ ରେ ୫୦ ପ୍ରତିଶତ ମାର୍କ ଥିବା ବାଧ୍ୟତାମୂଳକ ରଖାଯାଇଛି।
- ଅଗ୍ନିବୀର ଟ୍ରେଡ୍ସମ୍ୟାନ (୧୦ ମ ପାସ୍) ପଦବୀ ପାଇଁ କେବଳ ଦଶମ ପାସ୍ ହେବା ଜରୁରୀ । କିନ୍ତୁ ପ୍ରତି ବିଷୟରେ ଅତି କମରେ ୩୩ ପ୍ରତିଶତ ମାର୍କ ଥିବା ଆବଶ୍ୟକ ।
- ଅଗ୍ନିବୀର ଟ୍ରେଡ୍ସମ୍ୟାନ(୮ମ ପାସ୍) ପଦବୀ ପାଇଁ ମଧ୍ୟ କେବଳ ୮ମ ପାସ ଜରୁରୀ ଥିବା ବେଳ ପ୍ରତି ବିଷୟରେ ୩୩ ପ୍ରତିଶ ମାର୍କ ରଖଲେ ହିଁ ଆବେଦନ କରିହେବ
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
