ନୂଆଦିଲ୍ଲୀ: ଉତ୍ତର ଭାରତର କିଛି ଅଞ୍ଚଳରେ ପ୍ରବଳ ବର୍ଷା ଯୋଗୁ ଦୁର୍ଦ୍ଦଶା ବଢ଼ିବାରେ ଲାଗିଛି। ଏବେ ବି ପାହାଡ଼ିଆ ଅଞ୍ଚଳରେ ବର୍ଷା ଜାରି ରହିଛି। ହିମାଚଳ ପ୍ରଦେଶର ପାଲମପୁରରେ ରଶି ସାହାଯ୍ୟରେ ଫସି ରହିଥିବା ଲୋକଙ୍କୁ ଉଦ୍ଧାର କରାଯାଉଛି।
ରିପୋର୍ଟ ଅନୁସାରେ ଲାହୁଲ ଓ ସ୍ପିତିରେ ୧୫୦ ଜଣ ଲୋକ ଫସି ରହିଥିବା ଆଶଙ୍କା କରାଯାଉଛି। ୧୫୦ ଜଣଙ୍କ ମଧ୍ୟରୁ ୪୦ ଜଣ ଦାରଚା, ୫୦ ଜଣ ସରଚୁ ଓ ୬୦ ଜଣ ଚନ୍ଦ୍ରତାଲରେ ଫସି ରହିଛନ୍ତି। ଚନ୍ଦ୍ରତାଲରେ ଫସି ରହିଥିବା ୬୦ ଲୋକଙ୍କ ମଧ୍ୟରୁ ୫ ଜଣ ଆଇଆଇଟି ମଣ୍ଡିର ଛାତ୍ର ଅଛନ୍ତି।
ପଶ୍ଚିମବଙ୍ଗର ୯ ଜଣ ରସର୍ଚ୍ଚର ଲାହୁଲ ଓ ସ୍ପିତିରେ ନିଖୋଜ ହୋଇଯାଇଥିବା କୁହାଯାଉଛି। ସେମାନେ କ୍ୟାଙ୍ଗଷ୍ଟେ ଗ୍ଲାସିୟର ଅନୁଧ୍ୟାନ ପାଇଁ ଯାଇଥିଲେ।
ସେହିପରି ହିମାଚଳ ପ୍ରଦେଶ ଲାହୁଲ ଓ ସ୍ପିତି ପାଇଁ ଟ୍ରେକିଂଗରେ ଯାଇଥିବା ଆଇଆଇଟି ରୁଡକିର ୩୫ ଜଣ ଛାତ୍ର ନିଖୋଜ ହୋଇଯାଇଥିବା ଜଣାପଡ଼ିଛି। କିଲଙ୍ଗ୍ ଏଏସ୍ଡିଏମ୍ ଅମର ସିଂହ ନେଗୀ କହିଛନ୍ତି, “ଲାହୁଲ ଓ ସ୍ପିତିରେ ନିଖୋଜ ହୋଇଥିବା ବୋଲି କୁହାଯାଉଥିବା ଏକ ୮ ଜଣିଆ ଦଳ କୋକସର୍ କ୍ୟାମ୍ପରେ ସୁରକ୍ଷିତ ଅଛନ୍ତି।”
ହିମାଚଳ ପ୍ରଦେଶରେ ମୂଷଳଧାରାରେ ବର୍ଷା ହେବା ଯୋଗୁ କୁଲ୍ଲୁ, କାଙ୍ଗଡ଼ା ଓ ଚମ୍ୱା ଜିଲ୍ଲାରେ ଭିନ୍ନ ଘଟଣାରେ ୫ ଜଣଙ୍କ ମୃତ୍ୟୁ ଘଟିଛି। କୁଲ୍ଲୁ ଜିଲ୍ଲାରେ ହାଇ ଆଲର୍ଟ ଜାରି କରାଯାଇଛି। ବର୍ଷାକୁ ଦୃଷ୍ଟିରେ ରଖି ରାଜ୍ୟର ଉନା, ହମିରପୁର ଓ କୁଲ୍ଲୁରେ ପ୍ରବଳ ବର୍ଷା ହେବା ନେଇ ଚେତାବନୀ ଦିଆଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
