ବାଗଦାଦ୍: ଇରାକ୍ରେ ଥିବା ଆମେରିକାର ବାଲାଡ୍ ଏୟାର ବେସ୍ ଉପରେ ଲଗାତାର ରକେଟ୍ ମାଡ଼ରେ ୪ ଜଣ ଆହତ ହୋଇଛନ୍ତି। ଆମେରିକୀୟ ସେନା ରହୁଥିବା ରବିବାର ୭ଟି ମୋର୍ଟାର ବୋମା ଏହି ଏୟାର ବେସ୍ରେ ପଡ଼ିଥିଲା। ତେବେ କେହି ପ୍ରାଣ ହରାଇଥିବା ଏଯାଏ ଜଣାପଡ଼ିନାହିଁ।
ସାମରିକ ସୂତ୍ରରୁ ଜଣାପଡ଼ିଛି, ଏୟାରବେସ୍ର ରନ୍ୱରେ ବୋମା ପଡ଼ିଥିଲା। ଏହି ଏୟାରବେସ୍ ବାଗଦାଦ୍ରୁ ୮୦ କିଲୋମିଟର ଦୂରରେ ଅବସ୍ଥିତ। ପ୍ରାୟ ୪ ଜଣ ଇରାକୀ ଯବାନ ଆହତ ହୋଇଛନ୍ତି।
ଅଲ୍ ବାଲାଡ୍ ଏୟାର ବେସ୍ରେ ରହୁଥିବା ଆମେରିକାର ସିଂହଭାଗ ବାୟୁ ସେନା ଏହି ସ୍ଥାନ ଛାଡ଼ିଦେଇଛନ୍ତି। ସୂଚନାଯୋଗ୍ୟ ଯେ, ଆମେରିକାର ଏୟାରବେସ୍ ଗୁଡ଼ିକ ଲଗାତାର ରକେଟ୍ ମାଡ଼ର ଶିକାର ହେଉଛି। ଇରାନ୍ର ଜେନେରାଲ କାସିମ୍ ସୁଲେମାନୀଙ୍କୁ ଆମେରିକା ରକେଟ୍ ମାଡ଼ କରି ହତ୍ୟା କରିବା ପରେ ମଧ୍ୟପ୍ରାଚ୍ୟରେ ଅସ୍ଥିରତା ଲାଗି ରହିଛି।