ଚେନ୍ନାଇ: ବାହୁବଳୀଠାରୁ ଆରମ୍ଭ ଅନେକ ଟଲିଉଡ ଫିଲ୍ମରେ ଅଭିନୟ କରି ଅନ୍ତର୍ଜାତୀୟ ସ୍ତରରେ ଖ୍ୟାତି ଅର୍ଜନ କରିଥିବା ବରିଷ୍ଠ ଅଭିନେତ୍ରୀ ରାମାୟା କ୍ରିଷ୍ଣନ୍ନ ଏବେ ଭୁଲ କାମ ପାଇଁ ଚର୍ଚ୍ଚାକୁ ଆସିଛନ୍ତି। ଗୁରୁବାର ରାମାୟାଙ୍କ କାର୍ରୁ ପ୍ରାୟ ୯୬ ବୋତଲ ବିଦେଶୀ ମଦ ଜବତ ହୋଇଛି।
ପୁଲିସ୍ ରାସ୍ତାରୁ ଏତେ ପରିମାଣର ମଦ ଜବତ କରିବା ସହ ରାମାୟଙ୍କ ଡ୍ରାଇଭରଙ୍କୁ ଗିରଫ କରିଛି। ଏହି ମଦ ଜବତ ବେଳେ ରାମାୟ ମଧ୍ୟ କାର୍ ମଧ୍ୟରେ ରହିଥିଲେ।
ରାମାୟା ମହାବଳିପୁରମରୁ ଆସୁଥିଲେ। ଏହି ସମୟରେ ମୁଥୁକାଡୁ ଚେକ ପୋଷ୍ଟ ନିକଟରେ ତାଙ୍କ ଇନୋଭା କାର୍(ଟିଏ୦୭ ସିକ୍ୟୁ ୦୦୯୯)କୁ ପୁଲିସ୍ ଅଟକାଇ ଥିଲା। ଯାଞ୍ଚ ବେଳେ ତାଙ୍କ କାର୍ରୁ ୯୬ ବୋତଲ ମଦ ଜବତ ହୋଇଛି।
ଲକଡାଉନ ବେଳେ ଏତେ ପରିମାଣର ମଦ କେଉଁଆଡ଼େ ରାମାୟା ନେଉଥିଲେ, ତା’ର ଉତ୍ତର ଦେଇ ପାରି ନଥିଲେ। ଫଳରେ ଏଗୁଡ଼ିକୁ ପୁଲିସ୍ ଜବତ କରିଛି।
ଚେନ୍ନାଇରେ କରୋନା ସଂକ୍ରମଣ ଯୋଗୁ ମଦ ଦୋକାନ ବନ୍ଦ ରହିଛି। ତାମିଲନାଡୁର ଅନ୍ୟ ସ୍ଥାନରେ ଦୋକାନ ଖୋଲିଥିଲେ ହେଁ ଚେନ୍ନାଇରେ ସରକାର ମଦ ବିକ୍ରିକୁ ଅନୁମତି ଦେଇନାହାନ୍ତି। ଏପରି ସ୍ଥିତିରେ ରାମାୟାଙ୍କ କାର୍ରୁ ଏତେ ପରିମାଣର ମଦ ଜବତ ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।