ନୂଆଦିଲ୍ଲୀ: ଦିଲ୍ଲୀରେ ମଦ ବିକ୍ରି ଉପରେ ଲାଗିଲା ସ୍ୱତନ୍ତ୍ର କରୋନା ଫି । ୭୦ ପ୍ରତିଶତ ଅଧିକା ଟ୍ୟାକ୍ସ ଲାଗୁ କରିଛନ୍ତି ଦିଲ୍ଲୀ ସରକାର । ଆଜିଠୁ ଦିଲ୍ଲୀରେ ଲୋକେ ମଦକୁ ଅଧିକ ୭୦ ପ୍ରତିଶତ ଟ୍ୟାକ୍ସ ଦେଇ କିଣିବେ । ଗତକାଲି ତୃତୀୟ ପର୍ଯ୍ୟାୟ ଲକ୍ଡାଉନ୍ ଲାଗୁ ହେବା ପରେ ମଦ ବିକ୍ରି ଉପରେ ନିୟମ କୋହଳ ହୋଇଛି । ତେବେ ଗ୍ରୀନ୍ ଜୋନ୍ରେ ହିଁ କେବଳ ମଦ ବିକ୍ରି ପାଇଁ ଅନୁମତି ମିଳିଛି ।
ସୋମବାର ଦିଲ୍ଲୀର ଗ୍ରୀନ୍ ଜୋନ୍ରେ ମଦ ଦୋକାନ ଖୋଲିଥିବା ବେଳେ ଏହା ସମ୍ମୁଖରେ ଅସମ୍ଭବ ଭିଡ଼ ଦେଖାଦେଇଥିଲା। ଏହାକୁ ନିୟନ୍ତ୍ରଣ କରିବାକୁ ପୁଲିସ୍କୁ ନାକେଦମ ହେବାକୁ ପଡ଼ିଥିଲା। ଏହାକୁ ଦେଖି ଆଜି ସକାଳ ୯ଟାରୁ ସନ୍ଧ୍ୟା ସାଢେ ୬ଟା ଯାଏ ଖୋଲା ରହିବ ବୋଲି ସରକାର ଘୋଷଣା କରିଛନ୍ତି। ହେଲେ ଆଜି ସକାଳ ସାଢେ ୫ଟାରୁ ଦିଲ୍ଲୀର ବିଭିନ୍ନ ମଦ ଦୋକାନ ସମ୍ମୁଖରେ ଲୋକଙ୍କ ଭିଡ଼ ପରିଲକ୍ଷିତ ହେଉଛି। ମଦ ମୂଲ୍ୟରେ ୭୦ ପ୍ରତିଶତ ଅଧିକ ଫି ଆଦାୟକୁ ମଧ୍ୟ ଲୋକଙ୍କର ଖାତିର ନାହିଁ।
ଦିଲ୍ଲୀର ୧୫୦ ଛୋଟ, ବଡ଼ ଦୋକାନରେ ମଦ ବିକ୍ରି ହେଉଛି । ମଦ ବିକ୍ରି ହେଲେ ଆଦାୟ ହେବାକୁ ଥିବା ୭୦ ପ୍ରତିଶତ ଅଧିକ ଟ୍ୟାକ୍ସକୁ କରୋନା ମୁକାବିଲା କ୍ଷେତ୍ରରେ ବିନିଯୋଗ କରାଯିବ ବୋଲି ଦିଲ୍ଲୀ ସରକାର ସୂଚନା ଦେଇଛନ୍ତି । ତେବେ ଦିଲ୍ଲୀରେ ଏହି ନୂଆ ମଦ ନିୟମ ଲାଗୁ ପରେ ଏବେ ଅନ୍ୟ କିଛି ରାଜ୍ୟରେ ବି ଏହାକୁ ଲାଗୁ କରିବାକୁ ଯୋଜନା ପ୍ରସ୍ତୁତ ହେଉଛି । ଗତକାଲି କେବଳ କର୍ଣ୍ଣାଟକରେ ୪୫ କୋଟିର ମଦ ବିକ୍ରି ହୋଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
