ନୂଆଦିଲ୍ଲୀ: ପ୍ରଥମଥର ପାଇଁ ଜାତୀୟ ହସ୍ତତନ୍ତ ଦିବସ ଭାବେ ଅଗଷ୍ଟ ୭କୁ ଜାତୀୟ ସ୍ତରରେ ପାଳନ କରାଯିବ। ଏ ସଂକ୍ରାନ୍ତରେ ବିଭିନ୍ନ ସଂସ୍ଥା ଓ ଅନୁଷ୍ଠାନ ପକ୍ଷରୁ ପ୍ରସ୍ତାବ ଓ ଅନୁରୋଧ ପାଇଲା ପରେ କେନ୍ଦ୍ର ସରକାର ପ୍ରତିବର୍ଷ ଏହି ଦିନକୁ ଜାତୀୟ ହସ୍ତତନ୍ତ ଦିବସ ରୂପେ ପାଳନ କରିବାକୁ ସ୍ଥିର କରିଛନ୍ତି। ଚଳିତବର୍ଷ ଠାରୁ ଏହା ସାରା ଦେଶରେ ପାଳନ କରାଯିବ। ଆସନ୍ତା ୭ ତାରିଖ ଦିନ ଚେନ୍ନାଇ ଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାକୁ ଆନୁଷ୍ଠାନିକ ଭାବେ ଶୁଭାରମ୍ଭ କରିବେ। ଏହି ଅବସରରେ ୨୦୧୨, ୨୦୧୩ ଏବଂ ୨୦୧୪ ବର୍ଷ ପାଇଁ ସନ୍ଥ କବୀର ପୁରସ୍କାର ଓ ଜାତୀୟ ପୁରସ୍କାର ପ୍ରଦାନ କରାଯିବ । ଏହି ଅବସରରେ ଉତ୍ତମ ଗୁଣାତ୍ମକ ମାନଯୁକ୍ତ ହସ୍ତତନ୍ତ ଉତ୍ପାଦନର ବିକ୍ରୟ ଓ ବିତରଣ ସକାଶେ ଇଣ୍ଡିଆ ହେଣ୍ଡଲୁମ ଗୁଡ୍ସ ବ୍ରାଣ୍ଡର ଶୁଭାରମ୍ଭ କରାଯିବ। ଏହା ଦ୍ୱାରା ହସ୍ତତନ୍ତ କାରିଗରମାନଙ୍କର ରୋଜଗାର ବୃଦ୍ଧିପାଇବ ଓ ସେମାନେ ସମ୍ମାନର ସହ ଜୀବନଜୀବିକା ନିର୍ବାହ କରିପାରିବେ। ସୂଚନାଯୋଗ୍ୟ ଦେଶରେ ଏବେ ପ୍ରାୟ ୪୩ ଲକ୍ଷରୁ ଅଧିକ ଲୋକ ହସ୍ତତନ୍ତ ଶିଳ୍ପ ଓ ଏଥିସହ ସଂଶ୍ଳିଷ୍ଟ ଶିଳ୍ପରେ ନିୟୋଜିତ ଅଛନ୍ତି। ସେମାନଙ୍କ ମଧ୍ୟରେ ଅଧିକାଂଶ ଗାଁରେ ଥିବା ମହିଳା ଏବଂ ବିପିଏଲ ପରିବାରର । ହସ୍ତତନ୍ତ ଶିଳ୍ପ ଭାରତୀୟ ପରମ୍ପରା ଓ ସଂସ୍କୃତିର ଏକ ଅବିଚ୍ଛେଦ୍ୟ ଅଙ୍ଗ। ତେଣୁ ସବୁ ରାଜ୍ୟ ସରକାରମାନଙ୍କୁ ଏହି ଜାତୀୟ ଦିବସ ପାଳନ ନିମନ୍ତେ ଆବଶ୍ୟକ ପ୍ରସ୍ତୁତି କରିବା ସକାଶେ ପରାମର୍ଶ ଦିଆଯାଇଛି। ସମାଜର ସବୁ ବର୍ଗର ଲୋକଙ୍କୁ ଏଥିରେ ସାମିଲ କରିବା ଲାଗି କୁହାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
