ନୂଆଦିଲ୍ଲୀ: ରିଭ୍ୟୁ ପିଟିସନ୍ ସବୁକୁ ଖାରଜ କରି ସୁପ୍ରିମ୍କୋର୍ଟଙ୍କ ରାଫେଲ ରାୟ ପରେ ବିଜେପି ପକ୍ଷରୁ ଏହାକୁ ସ୍ୱାଗତ କରାଯାଇଛି। ଦଳ ପକ୍ଷରୁ କୁହାଯାଇଛି, ଏହା ସତ୍ୟର ଜୟ ଏବଂ ମୋଦି ସରକାରଙ୍କ ବୃହତ ବିଜୟ। ଦଳ ପକ୍ଷରୁ ମୁଖପାତ୍ର ଶାହନୱାଜ୍ ହୁସେନ୍ ଏଭଳି ମନ୍ତବ୍ୟ ଦେଇଛନ୍ତି।
ରାଫେଲ ମାମଲା ସମ୍ପର୍କରେ ମନ୍ତବ୍ୟ ଦେଇ କୋର୍ଟ ‘ଚୌକିଦାର ଚୋର ହୈ’ କହିଛନ୍ତି ବୋଲି ମନ୍ତବ୍ୟ ଦେଇଥିବା କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧିଙ୍କୁ ମଧ୍ୟ ସମାଲୋଚନା କରିଛନ୍ତି ବିଜେପି ନେତା। ଆଜି ସୁପ୍ରିମ୍କୋର୍ଟ ରାହୁଲଙ୍କୁ ଚେତାବନୀ ଦେବାପରେ ବିଜେପି ପକ୍ଷରୁ କଂଗ୍ରେସକୁ ଟାର୍ଗେଟ୍ କରାଯାଇଛି।
ବିଜେପି ସଂଗଠନ ସମ୍ପାଦକ ବିଏଲ୍ ସନ୍ତୋଷ କହିଛନ୍ତି, “ସୁପ୍ରିମ୍କୋର୍ଟ ରାଫେଲ୍ ଚୁକ୍ତି ସମ୍ପର୍କିତ ରିଭ୍ୟୁ ପିଟିସନ୍ ଖାରଜ କରିବା ସହ ରାହୁଲ ଗାନ୍ଧିଙ୍କୁ କଡ଼ା ଚେତାବନୀ ଦେଇଛନ୍ତି। ଏଥିସହ ସେ ଭବିଷ୍ୟତରେ ଏପରି ନ କହିବାକୁ ମଧ୍ୟ କହିଛନ୍ତି। ଏହା ମୋଦି ସରକାରଙ୍କ ବୃହତ ବିଜୟ।”
ଏହି ପ୍ରସଙ୍ଗରେ ମତ ଦେଇ କେନ୍ଦ୍ର ଆଇନ ମନ୍ତ୍ରୀ ତଥା ବରିଷ୍ଠ ବିଜେପି ନେତା ରବି ଶଙ୍କର ପ୍ରସାଦ କହିଛନ୍ତି, ଏହା ପ୍ରସାନିକ ବ୍ୟବସ୍ଥା ଏବଂ ନିଷ୍ପତ୍ତିରେ ମୋଦି ସରକାରଙ୍କ ସ୍ୱଚ୍ଛତା ଏବଂ ସାଧୁତାରର ପ୍ରତିଫଳନ।
ସେହିଭଳି କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଧ୍ୟ ଏହି ରାୟକୁ ସ୍ୱଗତ କରିଛନ୍ତି। ସେ କହିଛନ୍ତି, “ସମ୍ପୂର୍ଣ୍ଣ ସ୍ୱଚ୍ଛତା ଅବଲମ୍ବନ କରି ରାଫେଲ୍ ଚୁକ୍ତି କରାଯାଇଥିଲା। ଭାରତର ପ୍ରତିରକ୍ଷା ବ୍ୟବସ୍ଥାର ବିକାଶକୁ ଲକ୍ଷ୍ୟ ରଖି ଏବଂ ସେହିସମୟର ଆବଶ୍ୟକତା ଭିତ୍ତିରେ ଏହା କରାଯାଇଥିଲା। ଏହା ପ୍ରମାଣିତ କରିଛି ପ୍ରତିରକ୍ଷା ପ୍ରସ୍ତୁତି ଏବଂ ଜାତୀୟ ସୁରକ୍ଷାର ରାଜନୀତିକରଣ କରାଯିବା ଉଚିତ ନୁହେଁ।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
