କୋଲକାତା: ଶାରଦା ଚିଟଫଣ୍ଡ ଘୋଟାଲାରେ ସିବିଆଇ କୋଲକାତାର ଦୁଇ ପୁଲିସ ଅଧିକାରୀଙ୍କୁ ଆଜି କୋଲକାତା ସ୍ଥିତ ସିବିଆଇ କାର୍ଯ୍ୟାଳୟରେ ହାଜର ହେବା ପାଇଁ ନୋଟିସ୍ ପଠାଇଛି। କୋଲକାତାର ପୂର୍ବତନ ପୁଲିସ କମିଶନର ସିବିଆଇ ସମନ ସତ୍ତ୍ୱେ ହାଜର ନହେବା ପରେ, ଏବେ ସିବିଆଇ ଦୁଇ ପୁଲିସ ଅଧିକାରୀଙ୍କୁ ନୋଟିସ ପଠାଇବା କୋଲକାତା ପୁଲିସ ପାଇଁ ଅଡୁଆ ପରିସ୍ଥିତି ସୃଷ୍ଟି କରିଛି।
ଏହି ଦୁଇ ପୁଲିସ ଅଧିକାରୀ ହେଲେ ଅର୍ଣ୍ଣବ ଘୋଷ ଏବଂ ଦିଲ୍ଲୀପ ହାବ୍ରା। ଶାରଦା ଚିଟଫଣ୍ଡ ଘୋଟାଲାର ତଦନ୍ତ ପ୍ରଥମେ ପଶ୍ଚିମବଙ୍ଗ ସରକାର ଏକ ଏସଆଇଟି ଗଠନ କରି ତଦନ୍ତ କରିଥିଲେ। ସେତେବେଳେ ଏସଆଇଟି ଟିମର ନେତୃତ୍ୱ ନେଇଥିଲେ ଆଇପିଏସ ରାଜୀବ କୁମାର। ସମନ କରାଯାଇଥିବା ଦୁଇ ପୁଲିସ ଅଧିକାରୀ ରାଜୀବଙ୍କ ଟିମରେ ଥିଲେ ବୋଲି ଜଣାପଡ଼ିଛି।
ଏବେ ସିବିଆଇ ଏହି ଦୁଇ ପୁଲିସ ଅଧିକାରୀଙ୍କୁ ପଚରାଉଚରା କରି ଚିଟଫଣ୍ଡ ଘୋଟାଲା ଓ ରାଜୀବ କୁମାରଙ୍କ ବାବଦରେ ଅଧିକ ସୂଚନା ପାଇ ପାରିବ ବୋଲି ଆଶ ରଖିଛି। ଆଇପିଏସ ରାଜୀବ କୁମାର ଏସଆଇଟି ତଦନ୍ତ କରୁଥିବାବେଳେ ଅନେକ ପ୍ରମାଣ ନଷ୍ଟ କରିଦେଇଥିବା ସିବିଆଇ ପ୍ରମାଣ ପାଇଛି।
ବିବାଦୀୟ ଆଇପିଏସ ଅଫିସର ରାଜୀବ କୁମାରଙ୍କୁ ସିବିଆଇ ନୋଟିସ କରିଥିବା ବେଳେ ଲୁକ୍ ଆଉଟ ନୋଟିସ ମଧ୍ୟ ଜାରି କରିଛି। ଜାମିନ ନପାଇଥିବାରୁ ରାଜୀବ କୁମାର କୌଣସି ମୁହୂର୍ତ୍ତରେ ଗିରଫ ହୋଇପାରନ୍ତି ବୋଲି ଚର୍ଚ୍ଚା ହେଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
