ବେଜିଂ: ଆତଙ୍କବାଦୀ ସଂଗଠନ ସହିତ ସଂପର୍କ ଥିବା ସନ୍ଦେହ କରି ଚୀନ ପୋଲିସ୍ ୨୦ ଜଣ ବିଦେଶୀ ପର୍ଯ୍ୟଟକଙ୍କୁ ଗିରଫ କରିଛି। ଏମାନଙ୍କ ମଧ୍ୟରେ ଜଣେ ଭାରତୀୟ ଅଛନ୍ତି। ବ୍ରିଟେନର ବୈଦଶିକ ବିଭାଗ ଓ ଦକ୍ଷିଣ ଆଫ୍ରିକାର ଏକ ଚାରିଟି ‘ଗିଫ୍ଟ ଅଫ୍ ଦ ଗିଭରସ୍’ ପକ୍ଷରୁ ଏହି ସୂଚନା ଦିଆଯାଇଛି।
ଗିରଫ ୨୦ ବିଦେଶୀ ପର୍ଯ୍ୟଟକଙ୍କ ମଧ୍ୟରୁ ୧୧ ଜଣଙ୍କୁ ପୋଲିସ୍ ଛାଡ଼ି ଦେବାକୁ ରାଜି ହୋଇଛି। ତେବେ ବାକି ୯ ଜଣଙ୍କ ଅଟକ ରଖାଯିବ ବୋଲି କୁହାଯାଇଛି। ତେବେ ସେମାନଙ୍କ ଉପରେ କୌଣସି ଚାର୍ଜ ଲଗାଯିବ ନାହିଁ। ଏହି ୯ ଜଣଙ୍କ ମଧ୍ୟରେ ଦକ୍ଷିଣ ଆଫ୍ରିକର ୫ ଜଣ, ବ୍ରିଟେନର ୩ ଜଣ ଓ ଜଣେ ଭାରତୀୟ ଅଛନ୍ତି। ଏମାନେ ହୋଟେଲରେ ଏକ ବେଆଇନ ଘୋଷିତ ସଂଗଠନର ଭିଡିଓ ଦେଖୁଥିଲେ ବୋଲି ଚୀନ ପୋଲିସ୍ ଅଭିଯୋଗ କରିଛି।
ସୂଚନାଯୋଗ୍ୟ, ଏହି ୨୦ ଜଣିଆ ଦଳ ୪୭ ଦିନିଆ ଚୀନ ଗସ୍ତରେ ଥିଲେ।
ବ୍ରିଟେନର ବୈଦେଶିକ ବିଭାଗ ଓ ଦକ୍ଷିଣ ଆଫ୍ରିକାର ଦୂତାବାସ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇନଥିବା ବେଳେ ଭାରତୀୟ ଦୂତାବାସ ପକ୍ଷରୁ କୁହାଯାଇଛି ଯେ ଘଟଣା ସଂପର୍କରେ ଏହା ପାଖରେ କିଛି ସୂଚନା ନାହିଁ।
ଅନ୍ୟପକ୍ଷରେ ଗିରଫ ପର୍ଯ୍ୟଟକମାନଙ୍କୁ ମୁକ୍ତ କରିବା ପାଇଁ ଦକ୍ଷିଣ ଆଫ୍ରିକାର ଏକ ଚାରିଟି ‘ଗିଫ୍ଟ ଅଫ୍ ଦ ଗିଭରସ୍’ ମଧ୍ୟସ୍ଥତା କରୁଛି ବୋଲି ଜଣାପଡ଼ିଛି।