ନୂଆଦିଲ୍ଲୀ: ରାଜସ୍ଥାନର ରାଜନୀତିକ ସଙ୍କଟ ମଧ୍ୟରେ ପ୍ରଥମେ ସିବିଆଇ ଓ ଏବେ ହଠାତ୍ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ସକ୍ରିୟ ହୋଇ ଉଠିଛି। ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ଭାଇଙ୍କ ନାଁରେ ଥିବା ବିଭିନ୍ନ ଠିକଣାରେ ଆଜି ଇଡି ଚଢ଼ଉ କରିଥିବା ଜଣାପଡ଼ିଛି। ଫର୍ଟିଲାଇଜର ସ୍କାମ ଦୁର୍ନୀତିରେ ଗେହଲଙ୍କ ଭାଇଙ୍କ ସଂପୃକ୍ତି ଥିବା ଅଭିଯୋଗରେ ଇଡି ଏଭଳି ରେଡ୍ କରିଛି।
ବୁଧବାର ଫର୍ଟିଲାଇଜର ସ୍କାମର ତଦନ୍ତ କରୁଥିବା ଇଡି ଦେଶବ୍ୟାପୀ ଚଢ଼ଉ ଆରମ୍ଭ କରିଛି। ଏହିକ୍ରମରେ ଅଗ୍ରେସନ ଗେହଲଟଙ୍କ ବିଭିନ୍ନ ଠିକଣାରେ ବି ରେଡ୍ ହୋଇଛି। ଅଗ୍ରେସନ ଗେହଲଟ ହେଉଛନ୍ତି ଅଶୋକ ଗେହଲଟଙ୍କ ବଡ଼ ଭାଇ। ଆଜି ଇଡି ପକ୍ଷରୁ ରାଜସ୍ଥାନର ଯୋଧପୁର ସମେତ ପଶ୍ଚିମବଙ୍ଗର ୨ଟି, ଗୁଜରାଟ ଓ ଦିଲ୍ଲୀର ୪ଟି ସ୍ଥାନରେ ଚଢ଼ଉ କରାଯାଇଛି।
୨୦୧୭ରେ ବିଜେପି ଫର୍ଟିଲାଇଜର ସ୍କାମରେ ଅଶୋକ ଗେହଲଟଙ୍କ ଭାଇ ସଂପୃକ୍ତ ଥିବା ଅଭିଯୋଗ କରିଥିଲା। ୨୦୦୭ରୁ ୨୦୦୯ ମଧ୍ୟରେ ଗେହଲଟଙ୍କ ବଡ଼ ଭାଇ ସବସିଡି ଯୁକ୍ତ ଫର୍ଟିଲାଇଜର ରପ୍ତାନୀ କରିଥିଲେ। ଏହି ସମୟରେ ୟୁପିଏ କେନ୍ଦ୍ରରେ କ୍ଷମତାରେ ଥିଲା।
ଭାରତୀୟ ଚାଷୀଙ୍କ ପାଇଁ ଆସିଥିବା ସବସିଡି ଯୁକ୍ତ ଫର୍ଟିଲାଇଜରଗୁଡ଼ିକୁ ଗେହଲଟଙ୍କ ଭାଇ ହେରଫେର କରି ବିଦେଶୀକୁ ରପ୍ତାନୀ କରିଥିବା ଅଭିଯୋଗ ହୋଇଛି। ଅଗ୍ରେସନ ଗେହଲଟ ନିଜ କମ୍ପାନୀ ଅନୁପମ କୃଷି ଜରିଆରେ ପ୍ରଥମେ ସବସିଡି ଯୁକ୍ତ ଫର୍ଟିଲାଇଜର କିଣିଥିଲେ। ଏହାପରେ ଏହାକୁ ବିଦେଶକୁ ରପ୍ତାନୀ କରିଥିଲେ। ବିଶେଷ କରି ମ୍ୟାଲେସିୟା ଓ ଭିଏତନାମକୁ ଏହା ପଠାଯାଇଥିବା ଜଣେ ଇଡି ଅଧିକାରୀ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
