ଲକ୍ଷ୍ନୌ: ଗ୍ୟାଙ୍ଗଷ୍ଟର ବିକାଶ ଦୁବେ ସହ ସମ୍ପର୍କ ରଖିଥିବା ଅଭିଯୋଗରେ ଗିରଫ ଏସଆଇ କେକେ ଶର୍ମାଙ୍କୁ ଏବେ ଏନକାଉଣ୍ଟରର ଭୟ ଘାରିଛି। ଏଥିପାଇଁ କେକେ ଶର୍ମା ସୁରକ୍ଷା ଦାବି କରି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ପୁଲିସ୍ ଜୁଲାଇ ୨ ତାରିଖରେ ବିକୁର ଗାଁରେ ଲୁଚି ଥିବା ବିକାଶ ଦୁବେକୁ ଧରିବାକୁ ଯାଉଥିଲା।
ଏହାପୂର୍ବରୁ ହିଁ ବିକୁର ପୁଲିସ୍ ଷ୍ଟେସନରେ କାର୍ଯ୍ୟ କରୁଥିବା ଏସ୍ଆଇ କେକେ ଶର୍ମା ଏ ବାବଦରେ ବିକାଶକୁ ଖବର ଦେଇଥିଲେ। ଯେଉଁଥି ପାଇଁ ବିକାଶ ଦୁବେ ଓ ତା’ର ସହଯୋଗୀମାନେ ୮ ଜଣ ପୁଲିସ କର୍ମଚାରୀଙ୍କୁ ହତ୍ୟା କରିବାରେ ସକ୍ଷମ ହୋଇଥିଲେ। ଏହି ଘଟଣା ପରେ ଏସଟିଏଫ ବିକାଶ ଦୁବେ ଓ ତା’ର ସହଯୋଗୀଙ୍କୁ ଏନକାଉଣ୍ଟର କରିଛି।
ଏଥିସହ କେକେ ଶର୍ମାଙ୍କୁ ମଧ୍ୟ ଗିରଫ କରିଛି। ହେଲେ ବିକାଶ ଓ ତା’ ଗ୍ୟାଙ୍ଗର ସଦସ୍ୟମାନଙ୍କ ଭଳି ଏସଟିଏଫ ମଧ୍ୟ କେକେ ଶର୍ମା ଓ ତାଙ୍କ ପତ୍ନୀଙ୍କୁ ଏନକାଉଣ୍ଟର କରିଦେବ ବୋଲି ସେ ଆଶଙ୍କା କରିଛନ୍ତି। ସୁପ୍ରିମକୋର୍ଟ ଏଥିରେ ହସ୍ତକ୍ଷେପ କରିବା ସହ ତାଙ୍କୁ ଏବଂ ତାଙ୍କ ପତ୍ନୀ ବୀନିତାଙ୍କୁ ଉପଯୁକ୍ତ ସୁରକ୍ଷା ଯୋଗାଇ ଦେବାକୁ ଦାବି କରିଛନ୍ତି। ଏଥିସହ ବିକାଶ ଦୁବେ ସହ ତାଙ୍କର ସମ୍ପର୍କ ଥିବା ଯେଉଁ ଅଭିଯୋଗ ଉଠିଛି, ତା’ର ସିବିଆଇ ତଦନ୍ତ ପାଇଁ ମଧ୍ୟ ସେ ଦାବି କରିଛନ୍ତି।
କେକେ ଶର୍ମାଙ୍କ ବ୍ୟତୀତ ଛାଉବେୟପୁର ଏସ୍ଏଚ୍ଓ ବିନୟ ତିୱାରୀଙ୍କୁ ମଧ୍ୟ ପୁଲିସ୍ ବିକାଶ ଦୁବେ ସହ ସମ୍ପର୍କ ରଖିଥିବା ଅଭିଯୋଗରେ ଗିରଫ କରିଛି।