ନୂଆଦିଲ୍ଲୀ: ଏବେ ଇଣ୍ଟରନେଟ୍ରେ ଭାଇରାଲ ହେଉଥିବା ଭିଡିଓ ଆପଣଙ୍କୁ ହତବାକ କରିଦେବ। ଆପଣ ଅନେକ ଥର ଦେଖିଥିବେ ଯେ ଫିଲ୍ମରେ ହିରୋମାନେ ବେଶ ଆରମରେ ସୁଉଚ୍ଚ ଛାତ ଓ ସ୍ଥାନରୁ ଡେଇଁ ନିଜର ହିରୋଗିରି ଦେଖାଇ ଥାଆନ୍ତି। ହେଲେ ବାସ୍ତବ ଜୀବନରେ ଆପଣଙ୍କୁ ଯଦି ଏମିତି ଏକ ସ୍ଥିତିର ସମ୍ମୁଖୀନ ହେବାକୁ ପଡ଼େ, ତା’ହେଲେ ଆପଣ କ’ଣ ସୁଉଚ୍ଚରୁ ତଳକୁ ଡେଇଁବେ କି? ଏବେ ଭାଇରାଲ ହୋଇଥିବା ଭିଡିଓରେ ଦୁଇ ଜଣ ଛୋଟ ଭାଇ କେମିତି ଜୀବନ ବିକଳରେ ୩ ମହଲା କୋଠା ଉପରୁ ତଳକୁ ଡେଉଁଛନ୍ତି, ତା’ର ଦୃଶ୍ୟ ଦେଖିବାକୁ ମିଳିଛି।
ଦକ୍ଷିଣ ଫ୍ରାନ୍ସର ଗ୍ରେନୋବେଲ ସ୍ଥିତ ଏକ ଆପାର୍ଟମେଣ୍ଟରେ ଏପରି ଘଟଣା ଘଟିଛି। ଏହି ଅଞ୍ଚଳରେ ଥିବା ଗୋଟିଏ ଆପାର୍ଟମେଣ୍ଟରେ ନିଆଁ ଲାଗି ଯାଇଥିବା ଦେଖିବାକୁ ମିଳିଛି। ସେହି ଆପାର୍ଟମେଣ୍ଟର ଗୋଟିଏ କୋଠରୀରେ ଦୁଇ ଭାଇ ଫସିଯାଇଥିଲେ। ଜଣଙ୍କର ବୟସ ୧୦ ବର୍ଷ ହୋଇଥିବା ବେଳେ ଆଉ ଜଣଙ୍କ ବୟସ ୩ ବର୍ଷ। କୋଠରୀରେ ନିଆଁ ଲାଗି ଯିବାରୁ ଦୁଇ ଭାଇ ଆଉ ବାହାରକୁ ବାହାରି ପାରି ନଥିଲେ।
ଜୀବନ ମରଣର ଦୋ ଛକିରେ ଫସିଥିବା ଦୁଇ ଭାଇ ସାହସ କରି ଝରକା ପଟେ ତଳକୁ ଡେଇଁବାକୁ ଚେଷ୍ଟା ଆରମ୍ଭ କରିଥିଲେ। କିନ୍ତୁ ତଳେ ପଡ଼ିଲେ ମୃତ୍ୟୁ ନିଶ୍ଚିତ ବୋଲି ସେମାନେ ଆଶଙ୍କା କରିଥିଲେ।
ହେଲେ ଏହି ସମୟରେ ଆପାର୍ଟମେଣ୍ଟର କିଛି ଲୋକ ଦୁଇ ଭାଇଙ୍କୁ ସହଯୋଗ କରିବାକୁ ଆଗେଇ ଆସିଥିଲେ। ସେମାନେ ତଳେ ରହି ପିଲା ଦୁଇ ଜଣଙ୍କୁ ଡେଇଁବାକୁ କହିଥିଲେ। ଦୁଇ ଭାଇ ମଧ୍ୟ ଉପାୟ ନ ପାଇ ସେମାନଙ୍କ କଥାରେ ତଳକୁ ଡେଇଁଥିଲେ। ପ୍ରଥମେ ସାନ ଭାଇ ଡେଇଁଥିଲା। ଏହି ସମୟରେ ବେଶ ସାହସର ସହ ତଳେ ଥିବା ଲୋକମାନେ ତା’କୁ କ୍ୟାଚ୍ କରି ଦେଇଥିଲେ। ଏହାଦେଖି ବଡ଼ ଭାଇ ମଧ୍ୟ ତଳକୁ ଡେଇଁଥିଲା। ପଡ଼ୋଶୀମାନେ ତା’କୁ ମଧ୍ୟ କ୍ୟାଚ୍ କରି ନିଶ୍ଚିତ ମୃତ୍ୟୁରୁ ରକ୍ଷା କରିଦେଇଥିଲେ।
ଉଦ୍ଧାର ପରେ ଦୁଇ ଭାଇଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଥିଲା। ସେମାନଙ୍କର କୌଣସି କ୍ଷତି ହୋଇନଥିବା ଡାକ୍ତର କହିଛନ୍ତି। ତେବେ ପିଲା ଦୁଇ ଜଣଙ୍କୁ କ୍ୟାଚ୍ କରିବା ବଳେ ଜଣେ ବ୍ୟକ୍ତିଙ୍କ ହାତରେ ସାମାନ୍ୟ ଆଘାତ ଲାଗିଥିବା ଜଣାପଡ଼ିଛି। ତଥାପି ସେମାନେ ସାହସ ଦେଖାଇ ପିଲା ଦୁଇ ଜଣଙ୍କ ଜୀବନ ବଞ୍ଚାଇ ଥିବାରୁ ସ୍ଥାନୀୟ ପ୍ରଶାସନ ସମସ୍ତଙ୍କୁ ଶୁଭେଚ୍ଛା ଜଣାଇଛି।