ଲଣ୍ଡନ: ବ୍ରିଟେନର ଏକ ଫର୍ମା କମ୍ପାନୀରେ କାମ କରୁଥିବା ୪୨ ବର୍ଷୀୟ ଦୀପକ ପାଲିୱାଲ ଏବେ କରୋନା ଟିକାର ପରୀକ୍ଷଣ ପାଇଁ ନିଜ ଜୀବନକୁ ବାଜି ଲଗାଇ ଦେଇଛନ୍ତି। ଅକ୍ସଫୋର୍ଡ ବିଶ୍ୱ ବିଦ୍ୟାଳୟ ପକ୍ଷରୁ କୋଭିଡ-୧୯କୁ ମାତ୍ ଦେବା ପାଇଁ ଆରମ୍ଭ କରାଯାଇଥିବା ଟିକାର ହ୍ୟୁମାନ ଟ୍ରାଏଲରେ ନିଜକୁ ସ୍ୱେଚ୍ଛାସେବୀ ଭାବେ ସାମିଲ କରି ସେ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। ଟିକା ନେଉଥିବା ଲୋକଙ୍କ ଜୀବନ ପ୍ରତି ଅନେକ ପ୍ରକାରର ବିପଦ ସୃଷ୍ଟି ହେବାର ଆଶଙ୍କା ରହିଛି। ତଥାପି ଦୀପକ ଏହାକୁ ଖାତିର ନ କରି ନିଜକୁ ଟ୍ରାଏଲରେ ସାମିଲ କରିଛନ୍ତି।
ଦୀପକଙ୍କ ଏଭଳି ନିଷ୍ପତ୍ତିକୁ ପରିବାର ଲୋକ ସମର୍ଥନ କରି ନଥିଲେ। ସେ କହିଛନ୍ତି, ମୋ ପତ୍ନୀଙ୍କ ସମେତ ପରିବାର ଓ ବନ୍ଧୁମାନେ ମୋତେ ଏପରି ନ କରିବାକୁ କହିଥିଲେ। କିନ୍ତୁ ମୁଁ ବିଶ୍ୱକୁ ମହାମାରୀ କବଳରୁ ରକ୍ଷା କରିବା ପାଇଁ ଚାଲିଥିବା ପ୍ରକ୍ରିୟାରେ ସାମିଲ ହେବାକୁ ଏକ ପ୍ରକାରର ପ୍ରତିଜ୍ଞା ନେଇ ସାରିଥିଲି। ବିଶ୍ୱର ସୁରକ୍ଷା ଆଗରେ ମୋ ଜୀବନର ମୂଲ୍ୟ କିଛି ନୁହେଁ। ତେଣୁ ମୁଁ ଟ୍ରାଏଲରେ ସାମିଲ ହୋଇଥିଲି ବୋଲି ସେ କହିଛନ୍ତି।
ଏପ୍ରିଲ ୧୬ ତାରିଖରେ ପ୍ରଥମଥର ChAdOx1 nCoV-19 ଟିକା ୧୦୦୦ ଜଣ ସ୍ୱେଚ୍ଛାସେବୀ ଉପରେ ପ୍ରୟୋଗ କରାଯାଇଥିଲା। ଏବେ ଜୟପୁରର ମୂଳ ବାସିନ୍ଦା ଦୀପକ କହିଛନ୍ତି, ମୁଁ ଏଥିରେ ସାମିଲ ହୋଇଥିବାରୁ ବେଶ ଖୁସି। ସେହିପରି ମୋ ପତ୍ନୀ ମଧ୍ୟ ମୋତେ ନେଇ ଗର୍ବିତ।
ପ୍ରଥମରୁ ମୋତେ ସାମାନ୍ୟ ଡର ଲାଗୁଥିଲା। କାରଣ ଏହା ପୂର୍ବରୁ ଉକ୍ତ ଟିକାକୁ କେବଳ ପଶୁମାନଙ୍କ ଉପରେ ଟେଷ୍ଟ କରାଯାଇଥିଲା। ଲୋକମାନେ ମୋତେ ଅନେକ ପ୍ରକାରର ଚେତାବନୀ ଦେଇଥିଲେ। ଏପରି କି କିଛି ଲୋକ ଏହାର ପ୍ରଭାବ ମୋ ପୁରୁଷତ୍ୱ ଉପରେ ପଡ଼ିପାରେ ବୋଲି କହିଥିଲେ। ଖାଲି ସେତିକି ନୁହେଁ, ମୋ ଶରୀରରେ ଗୋଟିଏ ଯନ୍ତ୍ର ଲଗାଯିବ ଓ ମୋ ଗତିବିଧି ଉପରେ ନଜର ରଖାଯିବ ବୋଲି ବି କିଛି ଲୋକ କହିଥିଲେ।
ମେ’୧୧ ତାରିଖରେ ମୋତେ ଟିକା ଦିଆଯାଇଥିଲା ଓ ଏହାର ୩ ଘଣ୍ଟା ପରେ ମୁଁ ଘରକୁ ଫେରି ଆସିଥିଲି। ଟିକା ନେବା ପରେ ମୁଁ କ୍ରମାଗତ ଗାଇଡଲାଇନ ଅନୁଯାୟୀ ରିସର୍ଚ୍ଚ ସେଣ୍ଟରକୁ ଯାଉଛି। ଏବେ ସୁଦ୍ଧା ମୋର କୌଣସି ବି କ୍ଷତି ହୋଇନାହିଁ ବୋଲି ସେ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
