ପାଟନା: ବହୁ ଚର୍ଚ୍ଚିତ ଆଇଆରସିଟିସି ଦୁର୍ନୀତି ଘଟଣାରେ ଛନ୍ଦି ହୋଇଥିବା ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଆର୍ଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କୁ ଆଜି ଆଶ୍ୱସ୍ତ ମିଳିଛି। ଏହି ଦୁର୍ନୀତି ଘଟଣାରେ ସିବିଆଇ ଓ ଇଡି ତଦନ୍ତ କରୁଥିବା ବେଳେ ଆଜି ଦିଲ୍ଲୀର ପଟିଆଲା ହାଉସ୍କୋର୍ଟ ଲାଲୁ, ତାଙ୍କ ପୁଅ ତେଜସ୍ୱୀ ଯାଦବ ଓ ପତ୍ନୀ ରାବ୍ରୀ ଦେବୀଙ୍କୁ ନିୟମିତ ଜାମିନ୍ ପ୍ରଦାନ କରିଛନ୍ତି।
ସ୍ପେଶାଲ ଜଜ୍ ଅରୁଣ ଭରଦ୍ୱାଜ ସମସ୍ତଙ୍କୁ ୧ ଲକ୍ଷ ଟଙ୍କା ଲେଖାଏ ବ୍ୟକ୍ତିଗତ ବଣ୍ଡ ଓ ସମାନ ପରିମାଣର ସ୍ୟୁରିଟି ସହ ଏମାନଙ୍କୁ ନିୟମିତ ଜାମିନ୍ ଦେଇଛନ୍ତି।
କୋର୍ଟ ଜାନୁଆରୀ ୧୯ରେ ସମସ୍ତଙ୍କୁ ଆଭ୍ୟନ୍ତରୀଣ ଜାମିନ୍ ପ୍ରଦାନ କରିଥିଲେ। ଯାହାର ମିଆଦି ଆଜି ଶେଷ ହୋଇଥିଲା।
ଲାଲୁ ରେଳମନ୍ତ୍ରୀ ଥିବା ବେଳେ ଘରୋଇ ଫର୍ମାଠାରୁ ଟଙ୍କା ନେଇ ସେମାନଙ୍କୁ ରେଲୱେର ହୋଟେଲ ଦାୟିତ୍ୱ ଦେଇଥିବା ଅଭିଯୋଗ ହୋଇଥିଲା।
ଅନ୍ୟପକ୍ଷରେ ଆଜିର ଜାମିନ୍ ପରେ ମଧ୍ୟ ଲାଲୁ ଜେଲରୁ ବାହାରିପାରିବେ ନାହିଁ। କାରଣ ଏକାଧିକ ଗୋ-ଖାଦ୍ୟ ଦୁର୍ନୀତି ମାମଲାରେ ଲାଲୁଙ୍କୁ ଜେଲଦଣ୍ଡ ମିଳିଛି। ତେଣୁ ସେ ପୂର୍ବପରି ଜେଲ୍ରେ ରହିବେ।