ମୁମ୍ୱାଇ: ସୋମବାର ଦ୍ୱିତୀୟ ଥର ପାଇଁ ଇଡି ଜେରାର ସାମ୍ନା କରିବେ ଦିବଂଗତ ଅଭିନେତା ସୁଶାନ୍ତ ସିଂହ ରାଜପୁତଙ୍କ ବାନ୍ଧବୀ ରିଆ ଚକ୍ରବର୍ତ୍ତୀ। ଏଥିପାଇଁ ସମନ ପଠାଇଛି ଇଡି। ଏଥିସହ ସୁଶାନ୍ତଙ୍କ ସହ ତାଙ୍କ ମୁମ୍ୱାଇ ଘରେ ରହୁଥିବା ସାଙ୍ଗ ସିଦ୍ଧାର୍ଥ ପିଠାନୀଙ୍କୁ ମଧ୍ୟ ସମନ କରିଛି ଇଡି। ଅର୍ଥନୀତିକ ଦିଗକୁ ନେଇ ଖୋଳତାଡ କରିବା ପାଇଁ ଇଡି ସମନ ପଠାଇଛି। ଏବେ ତଦନ୍ତକୁ ଆହୁରି ଜୋରଦାର କରିବା ପାଇଁ ରିଆ ଚକ୍ରବର୍ତ୍ତୀଙ୍କ ବାପାଙ୍କୁ ମଧ୍ୟ ହାଜର ହେବା ପାଇଁ ଇଡି ନୋଟିସ୍ ପଠାଇଛି। ଉଭୟ ରିଆ ଏବଂ ତାଙ୍କ ବାପାଙ୍କୁ ମୁହାଁମୁହିଁ ଜେରା କରିବାକୁ ଇଡି ପ୍ରସ୍ତୁତ ହେଉଥିବା ସୂଚନା ରହିଛି।
ଏହା ପୂର୍ବରୁ ଶନିବାର ରିଆ ଚକ୍ରବର୍ତ୍ତୀଙ୍କ ଭାଇ ଶୋଭିକଙ୍କୁ ଶନିବାର ଇଡି ୧୮ ଘଣ୍ଟା ମାରାଥନ ଜେରା କରିଥିଲା। ଏହି ସମୟରେ ଶୋଭିକ ଅନେକ ତଥ୍ୟ ଲୁଚାଇଥିବା ସୂଚନା ରହିଛି।
ସୋମବାର ଇଡି ରିଆ ଏବଂ ତାଙ୍କ ବାପାଙ୍କୁ ତାଙ୍କ ସମ୍ପତ୍ତି ବାବଦରେ ପଚରା ଉଚରା କରିବ ବୋଲି ସୂଚନା ରହିଛି। ରିଆଙ୍କ କମ୍ପାନୀର ଆର୍ଥିକ କାରବାର, ଗତ ତିନି ବର୍ଷର ଆଇଟିଆର ଏବଂ ତିନିଟି କମ୍ପାନୀ ବାବଦରେ ଜାଣିବାକୁ ଚେଷ୍ଟା କରିବ। ଏମିତିକି ୨୦୧୮ରେ ଖୋଲାଯାଇଥିବା ଏହି ସବୁ କମ୍ପାନୀ ବାବଦରେ ପଚରା ଉଚରା କରାପାରେ ଇଡି।
ସାଇ ଫର୍ଚୁନ୍ ହେଉଛି ରିଆଙ୍କ ବାପାଙ୍କ ଫ୍ଲାଟ। ସୁଶାନ୍ତଙ୍କ କମ୍ପାନୀର ଭିଭରେଜ୍ ଏବଂ ଫ୍ରଣ୍ଟ ଇଣ୍ଡିଆର ଅଫିସ ଏହି ଫ୍ଲାଟରେ ପଞ୍ଜିକୃତ ହୋଇଛି। ସେଥିପାଇଁ ରିଆ ଏବଂ ତାଙ୍କ ବାପାଙ୍କୁ ମୁହାଁମୁହିଁ ପଚରାଉଚରା କରିବା ଆବଶ୍ୟକ ବୋଲି ଇଡି ହୃଦବୋଧ କରିଛି।
ସୁଶାନ୍ତ ଏବଂ ରିଆଙ୍କ ଚାଟାର୍ଡ ଆକାଉଣ୍ଟ ସନ୍ଦୀପ ଶ୍ରୀଧର ଏବଂ ରିତେଶ ଶାହାଙ୍କ ଦ୍ୱାରା ମିଳିଥିବା ସୂଚନା ଅନୁସାରେ ରିଆଙ୍କଠୁ ଅନେକ ତଥ୍ୟ ହାସଲ କରିବାକୁ ଯୋଜନା କରିଛି ଇଡି।
ରିଆ ଯେତେବେଳେ ପ୍ରଥମ ଥର ପାଇଁ ଇଡିରେ ହାଜର ହୋଇଥିଲେ ସେତେବେଳେ ଅନେକ ପ୍ରଶ୍ନର ଉତ୍ତର ଠିକ୍ ଭାବରେ ଦେଇପାରିନଥିବା ଜଣାପଡ଼ିଛି। ଏମିତିକି ସୁଶାନ୍ତଙ୍କ ଆକାଉଣ୍ଟରୁ ଟଙ୍କା ଉଠାଇବାକୁ ନେଇ ସଠିକ୍ ଉତ୍ତର ଦେଇପାରି ନଥିଲେ ରିଆ। କାରଣ ସୁଶାନ୍ତଙ୍କ ଚାଟାର୍ଡ ଆକାଉଣ୍ଟ ଏବଂ ରିଆଙ୍କ ଉତ୍ତର ଅଲଗା ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
