ନୂଆଦିଲ୍ଲୀ: ଲକ୍ଡାଉନ୍ ଅବଧି ଏପ୍ରିଲ ୧୫ରୁ ମେ’ ୩ ଯାଏ ପୁଣି ବୃଦ୍ଧି ପାଇଥିବାରୁ ଯାନବାହାନ ଏବଂ ସ୍ୱାସ୍ଥ୍ୟ ବୀମା ଅବଧି ବୃଦ୍ଧି ପାଇଛି। ଅର୍ଥ ମନ୍ତ୍ରଣାଳୟ ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ଏହାକୁ ବର୍ତ୍ତମାନ ମେ’ ୧୫ ଯାଏ ବୃଦ୍ଧି କରାଯାଇଛି। ପୂର୍ବରୁ ଏହା ଏପ୍ରିଲ ୨୧ ଯାଏ ବୃଦ୍ଧି ପାଇଥିଲା। ଏହା ଉଭୟ ଯାନବାହାନ ଏବଂ ସ୍ୱାସ୍ଥ୍ୟ ବୀମାଧାରୀଙ୍କୁ ପ୍ରିମିୟମ୍ ଭରିବା ପାଇଁ ଯଥେଷ୍ଟ ସମୟ ଦେବ।
ତେବେ ଏହି ଅବଧି ବୃଦ୍ଧି କେବଳ ମୋଟର ଥାର୍ଡ ପାର୍ଟି ପାଇଁ। ଏହା ଓନ୍ଡ ଡ୍ୟାମେଜ୍ ବା ବ୍ୟକ୍ତିଗତ ଦୁର୍ଘଟଣା ପାଇଁ ଲାଗୁହେବନି। ଆଇଆରଡିଏଆଇ ଅଧିକାରୀଙ୍କ କହିବା ଅନୁଯାୟୀ, ବୃଦ୍ଧି ପାଇଥିବା ଅବଧି ଏବଂ ବୈଧତା ମୋଟର ଥାର୍ଡ ପାର୍ଟି କମ୍ପୋନେଣ୍ଟ ପାଇଁ ଲାଗୁ ହେବ।
ଏହା ମାର୍ଚ୍ଚ ୨୫ରୁ ମେ’ ୩ ମଧ୍ୟରେ ସରିବାକୁ ଥିବା ପଲିସି ପାଇଁ ଲାଗୁ ହେବ। ଜଣେ ଅଧିକାରୀଙ୍କ କହିବା ଅନୁଯାୟୀ, ଏହି ଅବଧିରେ ବୈଧତା ସରିଥିଲେ ମଧ୍ୟ ପୂର୍ବବତ୍ କଭରେଜ୍ ରହିବ ଏବଂ ଅନ୍ୟ ସୁବିଧା ମିଳିପାରିବ।