ଶ୍ରୀନଗର: ରାତି ପାହିଲେ ଖୋଲିଥା’ନ୍ତା ସ୍କୁଲ। ଛାତ୍ରଛାତ୍ରୀ ଦେଇଥା’ନ୍ତେ ବୋର୍ଡ ପରୀକ୍ଷା। କିନ୍ତୁ କଶ୍ମିରୀଙ୍କ ପାଇଁ କୁମ୍ଭୀର କାନ୍ଦଣା କାନ୍ଦୁଥିବା ପାକିସ୍ତାନ ସମର୍ଥିତ ଆତଙ୍କବାଦୀ ଏହି ସରକାରୀ ସ୍କୁଲରେ ନିଆଁ ଲଗାଇଦେଇଥିବା ଭଳି ସାଂଘାତିକ ଖବର ଆସି ପହଞ୍ଚିଛି। ଜମ୍ମୁ-କଶ୍ମୀରର ଶୋପିଆନ୍ ଜିଲ୍ଲାରେ ଏଭଳି ଘଟଣା ଘଟିଛି।
ଶନିବାର ଏହି ସ୍କୁଲରେ ପରୀକ୍ଷା ହୋଇଥା’ନ୍ତା। ଆତଙ୍କବାଦୀମାନେ ପରୀକ୍ଷା ବାବଦରେ ସୂଚନା ପାଇ ଏହି ସ୍କୁଲ ଘର ଉପରେ ପେଟ୍ରୋଲ ବୋମା ମାଡ଼ କରିଥିଲେ। ଗତ କିଛି ସପ୍ତାହରେ ଏହା ଲଗାତାର ଦ୍ୱିତୀୟ ଘଟଣା।
ଗତ କିଛି ଦିନ ଆଗରେ ପୁଲ୍ୱାମାର ଏକ ସ୍କୁଲ ବାହାରେ ସୁରକ୍ଷାରେ ନିୟୋଜିତ ସୁରକ୍ଷାକର୍ମୀଙ୍କ ଉପରେ ଆକ୍ରମଣ କରିଥିଲେ ଆତଙ୍କବାଦୀ। ଏହି ସ୍ଥାନରେ ଗୁଳି ବିନିମୟ କାରଣରୁ ୫ ଜଣ ଛାତ୍ରଛାତ୍ରୀ ସ୍କୁଲ ଭିତରେ ହିଁ ଅଟକି ରହିଥିଲେ। ଗତକାଲି ଜମ୍ମୁ-କଶ୍ମୀର ରାଜ୍ୟ ୨ଟି କେନ୍ଦ୍ରଶାସିତ ଅଞ୍ଚଳରେ ପରିଣତ ହେବାପରେ ହିଁ ଏହି ଘଟଣା ଘଟିଛି।