ଅହମ୍ମଦାବାଦ୍: କିଛି ଦିନ ଧରି ଜାରି ରହିଥିବା ଚର୍ଚ୍ଚାର ଅବସାନ ଘଟିଛି। ଗୁଜରାଟ ଉପମୁଖ୍ୟମନ୍ତ୍ରୀ ଭାବେ ନୀତୀନ ପଟେଲ ରବିବାର ଦାୟିତ୍ୱ ସମ୍ଭାଳିଛନ୍ତି। ସଚିବାଳୟକୁ ଯାଇ ସେ କାର୍ଯ୍ୟରେ ଯୋଗଦେଇଛନ୍ତି। ଗତ କିଛି ଦିନ ଧରି ନୀତୀନଙ୍କ ଇସ୍ତଫା ଖବରକୁ ନେଇ ଜୋର ଧରିଥିଲା ଚର୍ଚ୍ଚା।
ମନ ପସନ୍ଦ ଦାୟିତ୍ୱ ମିଳି ନ ଥିବା ଯୋଗୁଁ ନୀତୀନ ଇସ୍ତଫା ଦେଇପାରନ୍ତି ବୋଲି ବିଜେପିରେ ଚର୍ଚ୍ଚା ହୋଇଥିଲା। ଏପରିକି ଶପଥ ନେବା ପରେ ବି କାର୍ଯ୍ୟାଳୟକୁ ଯାଇ ନ ଥିଲେ ନୀତୀନ। ଗତକାଲି ଏନେଇ ନୀତୀନ ପଟେଲଙ୍କ ଘରେ ବିଜେପି ନେତା ଏବଂ ବିଧାୟକଙ୍କ ବୈଠକରେ ହୋଇଥିଲା । ଅନ୍ୟପଟେ ଆଜି ନୀତୀନଙ୍କ ସହ ବିଜେପି ଅଧ୍ୟକ୍ଷ ଅମିତ ଶାହ କଥା ହୋଇଥିଲେ । ନୀତୀନଙ୍କୁ ଗୁରୁ ଦାୟିତ୍ୱ ମିଳିବା ନେଇ ଶାହ ପ୍ରତିଶ୍ରୁତି ଦେଇଥିବା ସେ କହିଥିଲେ। ପୂର୍ବ ଥର ସରକାରରେ ଅର୍ଥ ଏବଂ ସହରାଞ୍ଚଳ ବିକାଶ ମନ୍ତ୍ରୀ ଥିଲେ ପଟେଲ।
ଗୁଜରାଟରେ ବିଜେପିରେ ପଟିଦାର ସମ୍ପଦ୍ରାୟର ଏହି ନେତା ଜଣକ ବେସ୍ ପରିଚିତ। ଅନ୍ୟପଟେ ନୀତନଙ୍କୁ ଦଳ ଛାଡ଼ି କଂଗ୍ରେସରେ ଯୋଗ ଦେବା ପାଇଁ ମଧ୍ୟ ପଟିଦାର ନେତା ହାର୍ଦ୍ଦିକ ପଟେଲ ଆହ୍ୱାନ ଦେଇଥିଲେ।