ନୂଆଦିଲ୍ଲୀ: ଆଜି ବିଜେପି ରାଷ୍ଟ୍ରୀୟ କାର୍ଯ୍ୟକାରୀ ସଭାପତି ଜେ.ପି ନଡ୍ଡା ଦଳୀୟ ପଦାଧିକାରୀଙ୍କ ସହ ଏକ ଉଚ୍ଚସ୍ତରୀୟ ବୈଠକ କରିଛନ୍ତି। ଏହି ବୈଠକରେ ଦଳର ପଦାଧିକାରୀଙ୍କ ସହ ଆଗାମୀ ଦିନରେ ହେବାକୁ ଥିବା ୪ ରାଜ୍ୟର ବିଧାନସଭା ନିର୍ବାଚନ ବାବଦରେ ଆଲୋଚନା କରିଛନ୍ତି। ଚଳିତ ବର୍ଷ ଶେଷ ଆଡ଼କୁ ଝାରଖଣ୍ଡ, ହରିଆଣା ଓ ମହାରାଷ୍ଟ୍ରରେ ବିଧାନସଭା ପାଇଁ ନିର୍ବାଚନ ହେବ ବୋଲି ଜଣାପଡ଼ିଥିବା ବେଳେ ଆସନ୍ତା ବର୍ଷ ଦିଲ୍ଲୀ ବିଧାନସଭା ନିର୍ବାଚନ ରହିଛି।
ପାଖାପାଖି ୩ ଘଣ୍ଟା ଧରି ଏହି ବୈଠକ ଚାଲିଥିଲା। ଏଥିରେ ବିଜେପି ସଦସ୍ୟ ସଂଗ୍ରହ ଅଭିଯାନକୁ ନେଇ ମଧ୍ୟ ଆଲୋଚନା ହୋଇଥିଲା। ସେହିପରି କେନ୍ଦ୍ର ସରକାରଙ୍କ ନୂଆ ବଜେଟ ବାବଦରେ ତୃଣମୂଳ ସ୍ତରର ଲୋକଙ୍କ ପାଖରେ କିଭଳି ସକାରାତ୍ମକ ବାର୍ତ୍ତା ପହଞ୍ଚିବ, ସେ ନେଇ ଆଲୋଚନା ହୋଇଥିବା ଜଣାପଡିଛି। ୧୧ କୋଟି ସଦସ୍ୟ ସହ ବିଜେପି ବିଶ୍ୱର ସବୁଠାରୁ ବଡ଼ ରାଜନୀତିକ ଦଳ ବୋଲି ଦାବି କରିଛି।
ଏହି ବୈଠକରେ ଗୃହମନ୍ତ୍ରୀ ତଥା ବିଜେପି ରାଷ୍ଟ୍ରୀୟ ସଭାପତି ଅମିତ ଶାହ ଉଦବୋଧନ ଦେବାର ଥିଲା। କିନ୍ତୁ କାର୍ଯ୍ୟବ୍ୟସ୍ତତା ଯୋଗୁଁ ସେ ବୈଠକରେ ଯୋଗ ଦେଇପାରିନଥିଲେ।