ମୁମ୍ବାଇ: କରୋନା ଲକଡାଉନ ମଧ୍ୟରେ ମଦ ଦୋକାନ ଖୋଲିବାରୁ ଏହାକୁ କିଣିବା ପାଇଁ ପ୍ରବଳ ଭିଡ଼ ଜମୁଛି। ଲୋକମାନେ ସାମାଜିକ ଦୂରତାକୁ ଭୁଲି ମଦ ଦୋକାନ ଆଗରେ ଭିଡ଼ କରୁଛନ୍ତି। ଭିଡ଼କୁ ନିୟନ୍ତ୍ରଣ କରିବା ଓ ଲୋକଙ୍କ କରୋନା ଦାଉରୁ ରକ୍ଷା କରିବା ପାଇଁ ମହାରାଷ୍ଟ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି।
ଆସନ୍ତାକାଲିଠାରୁ ମହାରାଷ୍ଟ୍ରରେ ମଦର ହୋମ ଡେଲିଭରୀ ଆରମ୍ଭ କରାଯିବ ବୋଲି ସରକାର କହିଛନ୍ତି। ମହାରାଷ୍ଟ୍ର ସରକାର ମଙ୍ଗଳବାର ଠାରୁ ହିଁ ମଦର ହୋମଡେଲିଭରୀ ଆରମ୍ଭ କରିବାକୁ ପ୍ରଥମେ ଘୋଷଣା କରିଥିଲେ। ହେଲେ ମଦ ଦୋକାନୀମାନେ ନିଜକୁ ଏଥିପାଇଁ ପ୍ରସ୍ତୁତ କରିବାକୁ କିଛି ସମୟ ମାଗିଥିଲେ। ସେମାନଙ୍କ ସହ ଆଲୋଚନା କରି ସରକାର ଶୁକ୍ରବାର ଠାରୁ ମଦର ହୋମ ଡେଲିଭରୀ ଆରମ୍ଭ ହେବ ବୋଲି ବିଜ୍ଞପ୍ତି ଜାରି କରିଛନ୍ତି।
ଏଥିରେ କୁହାଯାଇଛି ଯେ କଣ୍ଟେନମେଣ୍ଟ ଜୋନକୁ ଛାଡ଼ି ଯେଉଁ ସବୁ ଅଞ୍ଚଳରେ ମଦ ଦୋକାନ ଖୋଲିବାକୁ ଅନୁମତି ମିଳିଛି, ସେଠାରେ ଏହାର ହୋମ ଡେଲିଭରୀ ହୋଇପାରିବ। ଗୋଟିଏ ମଦ ଦୋକାନା ୧୦ ଜଣରୁ ଅଧିକ ଡେଲିଭରୀ ବୟ ନିଯୁକ୍ତ କରିପାରିବେ ନାହିଁ। ସେହିପରି ଜଣେ ଡେଲିଭରୀ ବୟ ଗୋଟିଏ ଥରରେ ୨୪ଟି ମଦ ବୋତଲ ଲୋକଙ୍କ ପାଖକୁ ନେଇ ଯାଇପାରିବେ।
ମଦ ଦୋକାନୀମାନେ ହୋମ ଡେଲିଭରୀ କରିବାକୁ ଥିଲେ ମଧ୍ୟ ଅଧିକ ଦାମ ନେଇପାରିବେ ନାହିଁ। ମଦ ବୋତଲ ଉପରେ ଯେତିକି ଲେଖା ଯାଇଛି, ସେତିକି ଟଙ୍କାରେ ଗ୍ରାହକଙ୍କୁ ଏହା ବିକ୍ରି କରିବେ। ମଦର ହୋମ ଡେଲିଭରୀ ପାଇଁ ଅନୁମତି ଦିଆଯାଇଥିଲେ ହେଁ ଦୋକାନୀମାନେ ପୂର୍ବଭଳି ସାମାଜିକ ଦୂରତା ବଜାୟୀ ରଖିବେ ଓ କର୍ମଚାରୀମାନେ ନିୟମିତ ସାନିଟାଇଜ ହେବେ ବୋଲି କୁହାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
