ଶ୍ରୀନଗର: ଜମ୍ମୁ ଓ କାଶ୍ମୀରରେ ଲାଗି ରହିଥିବା ଅଶାନ୍ତ ପରିବେଶ ଶାନ୍ତ ହେବାର ନାଁ ନେଉନାହିଁ। ଆଜି ପବିତ୍ର ଇଦ୍ ଅବସରରେ ମଧ୍ୟ ଘାଟି ଅଞ୍ଚଳରେ ହିଂସା ଦେଖିବାକୁ ମିଳିଥିଲା। ମଙ୍ଗଳବାର ବାନ୍ଦିପୁର ଓ ଶୋପିୟାରେ ବିକ୍ଷୋଭକାରୀ ଏବଂ ସୁରକ୍ଷାକର୍ମୀଙ୍କ ମୁହାଁମୁହିଁ ହେବା ଫଳରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ଏହାସହ ଶ୍ରୀନଗରର କିଛି ସ୍ଥାନରେ ମଧ୍ୟ ହିଂସା ଦେଖିବାକୁ ମିଳିଥିଲା। ଘାଟିରେ ଲାଗି ରହିଥିବା ହିଂସା ଯୋଗୁଁ ମୃତ୍ୟୁ ସଂଖ୍ୟା ୮୨କୁ ବୃଦ୍ଧି ପାଇଛି।
ଦୀର୍ଘ ବର୍ଷ ପରେ ଇଦ୍ ଅବସରରେ ଘାଟିରେ କର୍ଫ୍ୟୁ ଜାରି କରାଯାଇଛି। ପ୍ରାୟ ୧୦ଟି ଜିଲ୍ଲାରେ ଏହି କର୍ଫ୍ୟୁ ଲଗାଯାଇଛି। ଏହାସହ ହେଲିକପ୍ଟର ଓ ଡ୍ରୋନ୍ କ୍ୟାମେରାରେ ବିଭିନ୍ନ ଅଞ୍ଚଳ ଉପରେ ନଜର ରଖାଯାଇଛି।
ଜଣେ ଅଧିକାରୀଙ୍କ କହିବା ଅନୁସାରେ “ଗତକାଲି ବିଳମ୍ବିତ ରାତିରେ ଘାଟିରେ କର୍ଫ୍ୟୁ ଜାରି କରାଯାଇଛି। ସେନ୍କୁ ସଜାଗ ରହିବାକୁ କୁହାଯାଇଛି। ଘାଟିରେ ହିଂସା ଅଧିକ ବଢିଲେ ସେନା ହସ୍ତକ୍ଷେପ କରିବ। ବିଶେଷ କରି ଗ୍ରାମାଞ୍ଚଳର ସମ୍ବେଦନଶୀଳ ସ୍ଥାନରେ ଯବାନଙ୍କୁ ମୁତୟନ କରାଯାଇଛି।”