ନୂଆଦିଲ୍ଲୀ: ପୁଅ କରିଥିବା କାଣ୍ଡ ପାଇଁ ମା’ ଉପରେ ପ୍ରତିଷୋଦ ନେଲା ନାବାଳିକା। ଦୁଷ୍କର୍ମ ଅଭିଯୁକ୍ତର ମା’କୁ ଗୁଳି କରିଦେଲା ନାବାଳିକା। ଶନିବାର ଦିଲ୍ଲୀର ଗୋଣ୍ଡା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ଜଣେ ନାବାଳିକାଙ୍କ ଗୁଳିରେ ଜଣେ ୫୦ ବର୍ଷୀୟ ମହିଳା ଆହତ ହୋଇଛନ୍ତି। ଦୁଇ ବର୍ଷ ପୂର୍ବେ ସମ୍ପୃକ୍ତ ମହିଳାଙ୍କ ପୁଅ ଉକ୍ତ ନାବାଳିକାକୁ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା। ଶନିବାର ସନ୍ଧ୍ୟା ୫ଟା ୩୦ରେ ଦିଲ୍ଲୀର ଉତ୍ତର ଘୋଣ୍ଡାର ସୁଭାଷ ମହଲ୍ଲାରେ ଏହି ଘଟଣା ସମ୍ପର୍କରେ ପୁଲିସ ଖବର ପାଇଥିଲା। ଆହତ ମହିଳା ଜଣକ ହେଉଛନ୍ତି ସୁଭାଷ ମହଲ୍ଲା ନିବାସୀ ଖୁରସିଦା। ସ୍ଥାନୀୟ ଲୋକେ ତାଙ୍କୁ ଡାକ୍ତରଖାନାରେ ଭର୍ତ୍ତି କରିଛନ୍ତି।
ମହିଳାଙ୍କର ଏକ ତେଜରାତି ଦୋକାନ ରହିଛି। ତାଙ୍କ ପୁଅ ଜଣେ ଦୁଷ୍କର୍ମ ଅଭିଯୁକ୍ତ ବୋଲି ପୁଲିସ କହିଛି। ନାବାଳିକାଙ୍କ ବୟସ ୧୬ରୁ ୧୭ ବର୍ଷ ମଧ୍ୟରେ ହେବ। ଶନିବାର ଦୋକାନକୁ ଆସି ନାବଳିକା ଜଣକ ମହିଳାଙ୍କୁ ଗୁଳି କରିଥିଲେ। ପୁଲିସ ଉକ୍ତ ପିସ୍ତଲକୁ ଜବତ କରିଛି। ଗୁଳି ଚଳାଇଥିବା ନାବାଳିକାକୁ ଗିରଫ କରାଯାଇଛି। ପ୍ରାଥମିକ ଚିକିତ୍ସା ପରେ ଆହତମାନଙ୍କୁ ଜିଟିବି ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଘଟଣାରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି ପୁଲିସ କହିଛି।