ବିଶାଖାପଟନମ: ଆନ୍ଧ୍ର ପ୍ରଦେଶର ବିଶାଖାପଟନମରେ ଥିବା ହିନ୍ଦୁସ୍ତାନ ପେଟ୍ରୋଲିୟମ କର୍ପୋରେସନ ଲିଃ(ଏଚପିସିଏଲ୍)ରେ ଆଜି ଭୟଙ୍କର ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡ ପରେ ପ୍ଲାଣ୍ଟଟି ହୁତୁହୁତ ହୋଇ ଜଳୁଥିବା ବେଳେ ଏହା ମଧ୍ୟରୁ ପ୍ରବଳ ଧୂଆଁ ବାହାରିବାରେ ଲାଗିଛି। ଏହାର ଭିଜୁଆଲ ସାମ୍ନାକୁ ଆସିଛି।
ଅଗ୍ନିକାଣ୍ଡର ଖବର ପାଇ ଏକାଧିକ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାରେ କରିବାରେ ଲାଗିଛନ୍ତି। ଡିଭିଜନାଲ କମିଶନର ଅଫ ପୁଲିସ୍ ଐଶ୍ୱର୍ଯ୍ୟା ରସ୍ତୋଗୀ କହିଛନ୍ତି, “ଏଚପିସିଏଲର ୟୁନିଟ-୩ ପ୍ଲାଣ୍ଟରେ ପ୍ରଥମେ ବିସ୍ଫୋରଣ ହୋଇଥିଲା। ଏହାପରେ ଏହା ହୁତୁହୁତୁ ହୋଇ ଜଳିବା ଆରମ୍ଭ କରିଥିଲା। ପ୍ରାଥମିକ ଅବସ୍ଥାରେ ୫ଟି ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। କିନ୍ତୁ ସ୍ଥିତି ବେକାବୁ ହେବାରୁ ଆଉ କିଛି ଦମକଳ ବାହିନୀ ଘଟଣାସ୍ଥଳକୁ ଆସୁଛନ୍ତି। ଏଯାଏ ଅଗ୍ନିକାଣ୍ଡର କାରଣ ଜଣାପଡ଼ିନାହିଁ। ସେହିପରି କୌଣସି ମୃତାହତର ଖବର ମିଳିନାହିଁ।”
ଅଗ୍ନିକାଣ୍ତ ବେଳେ ପ୍ଲାଣ୍ଟରେ ଶତାଧିକ ଲୋକ କାମ କରୁଥିଲେ। ବିସ୍ଫୋରଣ ପରେ ସତର୍କ ଘଣ୍ଟି ବାଜିଥିଲା। ଫଳରେ କର୍ମଚାରୀମାନେ ପ୍ଲାଣ୍ଟ ମଧ୍ୟରେ ଅଘଟଣ ଘଟିଥିବା ଅନୁମାନ କରି ବାହାରକୁ ଦୌଡ଼ି ଥିଲେ।