ନୂଆଦିଲ୍ଲୀ: ଶେଷରେ ଗିରଫ ହେଲେ ଶଙ୍କର ମିଶ୍ରା। ବିମାନରେ ଜଣେ ସହଯାତ୍ରୀ ତଥା ୭୦ ବର୍ଷୀୟ ବୃଦ୍ଧାଙ୍କ ଉପରେ ପରିସ୍ରା କରିବା ଅଭିଯୋଗରେ ଶଙ୍କରଙ୍କୁ ଗିରଫ କରିଛି ପୁଲିସ। ଘଟଣା ପରେ ଆତ୍ମଗୋପନ କରିଥିବା ଶଙ୍କରଙ୍କୁ ବେଙ୍ଗାଲୁରରୁ ଗିରଫ କରିଛି ପୁଲିସ। ବିମାନରେ ଜଣେ ୭୦ ବର୍ଷୀୟ ବୃଦ୍ଧାଙ୍କ ଉପରେ ପରିସ୍ରା କରିବା ଘଟଣା ଜାତୀୟସ୍ତରରେ ବେଶ ଚର୍ଚ୍ଚାର ବିଷୟ ପାଲଟିଥିଲା। ଶଙ୍କରଙ୍କର ଏଭଳି ଅସଭ୍ୟ ବ୍ୟବହାରକୁ ନେଇ ବିଭିନ୍ନ ମହଲରେ ନିନ୍ଦା କରାଯାଇଥିବା ବେଳେ ପୁଲିସ ତାଙ୍କୁ ଗିରଫ ପାଇଁ ଲୁକ ଆଉଟ୍ ସର୍କୁଲାର ଜାରି କରିଥିଲା। ଏଥିପାଇଁ ଦିଲ୍ଲୀ ପୁଲିସ ମୁମ୍ବାଇ ,ବେଙ୍ଗାଲୁର ତଥା ଅନ୍ୟାନ୍ୟସ୍ଥାନରେ ସର୍ଚ୍ଚ ଅପରେଶନ ଜାରି ରଖିଥିଲା।
ସୂଚନା ଅନୁଯାୟୀ, ଗତବର୍ଷ ୨୬ ନଭେମ୍ବରରେ ନ୍ୟୁୟର୍କରୁ ଦିଲ୍ଲୀ ଆସୁଥିବା ଏୟାର ଇଣ୍ଡିଆ ବିମାନରେ ଶଙ୍କର ମିଶ୍ରା ପ୍ରଚୁର ମଦ୍ୟପାନ କରି ଜଣେ ମହିଳାଙ୍କ ଉପରେ ପରିସ୍ରା କରିଥିଲେ। ଶଙ୍କର ମିଶ୍ରା ସଂପର୍କରେ ଏୟାର ଇଣ୍ଡିଆ ସବୁ ତଥ୍ୟ ସାର୍ବଜନୀନ କରିବା ପରେ ତାଙ୍କୁ ନିଯୁକ୍ତି ଦେଇଥିବା କମ୍ପାନି ୱେଲ୍ସ ଫାର୍ଗୋ ବହିଷ୍କାର କରିଛି। ବିମାନରେ ଅଶୋଭୀନୟ ସ୍ଥିତି ସୃଷ୍ଟି କରିଥିବା କର୍ମଚାରୀଙ୍କୁ ଆମେ ବହିଷ୍କାର କରିଛୁ ବୋଲି କମ୍ପାନି ପକ୍ଷରୁ କୁହାଯାଇଛି। ଅନ୍ୟପକ୍ଷରେ ମିଶ୍ରା ଘଟଣା ପରଠାରୁ ଫେରାର ଥିଲେ। ।