ନୂଆଦିଲ୍ଲୀ: ତାଜ ମହଲ ଠାରୁ ଆରମ୍ଭ କରି ଦିଲ୍ଲୀରେ ଥିବା ରେଡ ଫୋର୍ଟ ଯାଏ ଦେଶର ସମସ୍ତ ଐତିହାସିକ କୀର୍ତ୍ତିରାଜି ଆସନ୍ତା ୬ ତାରିଖରୁ ଖୋଲିବ। ମାର୍ଚ୍ଚ ମାସରେ ଦେଶରେ ଲକଡାଉନ ଜାରି ହେବା ଠାରୁ ଏଗୁଡ଼ିକ ବନ୍ଦ ରହିଥିଲା। ହେଲେ ଆସନ୍ତା ସୋମବାର ଠାରୁ ଏଗୁଡ଼ିକ ସର୍ବସାଧାରଣ ପାଇଁ ଖୋଲିବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୧ ଦିନିଆ ଲକଡାଉନ ଘୋଷଣା କରିବା ପୂର୍ବରୁ ଅର୍ଥାତ ମାର୍ଚ୍ଚ ୧୭ରୁ ଏଏସ୍ଆଇ ଦେଶର ୩୪୦୦ଟି କୀର୍ତ୍ତିରାଜିକୁ ସାଧାରଣ ଲୋକଙ୍କ ପାଇଁ ବନ୍ଦ କରିଥିଲା। ସରକାର ଅନଲକ-୧ ଘୋଷଣା କରିବା ପରେ ଏଏସ୍ଆଇ ପ୍ରାୟ ୮୨୦ଟି ଧର୍ମାନୁଷ୍ଠାନ ଖୋଲିଥିଲା।
ବାକି ଥିବା କୀର୍ତ୍ତିରାଜି ଗୁଡ଼ିକ ଆସନ୍ତା ୬ ତାରିଖ ଠାରୁ ଖୋଲିପାରିବ ବୋଲି ଆଜି ପର୍ଯ୍ୟଟନ ମନ୍ତ୍ରୀ ପ୍ରହ୍ଲାଦ ସିଂହ ପଟେଲ ସୂଚନା ଦେଇଛନ୍ତି। ତେବେ କେନ୍ଦ୍ର ସରକାର ଅନୁମତି ଦେଇଥିଲେ ହେଁ କରୋନା ସ୍ଥିତିକୁ ଦୃଷ୍ଟିରେ ରଖି ରାଜ୍ୟ ସରକାରମାନେ ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନେଇପାରିବେ ବୋଲି ସେ କହିଛନ୍ତି।