ରାଞ୍ଚି: ଝାରଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ମନ୍ତ୍ରିମଣ୍ଡଳରେ ଥିବା ଜଣେ ସଦସ୍ୟ ମହାମାରୀ କରୋନା ଆକ୍ରାନ୍ତ ହୋଇଛନ୍ତି। ମନ୍ତ୍ରୀଙ୍କ ରିପୋର୍ଟ ପଜିଟିଭ ଆସିବାରୁ ଶାସନ କଳରେ ଥିବା ନେତା ଓ ଅନ୍ୟ ସଦସ୍ୟଙ୍କ ମଧ୍ୟରେ ସଂକ୍ରମଣର ଆଶଙ୍କା ବଢ଼ିଛି। ଖୋଦ୍ ମୁଖ୍ୟମନ୍ତ୍ରୀ ସଂକ୍ରମଣ ଭୟରେ ନିଜକୁ କ୍ୱାରେଣ୍ଟାଇନ କରିନେଇଛନ୍ତି।
ରାଞ୍ଚି ସ୍ଥିତ ବାସଭବନରେ ସେ ୧୪ ଦିନ ସଂଗରୋଧରେ ରହିବେ ବୋଲି ଜଣାପଡ଼ିଛି। ରାଜ୍ୟ ସରକାରଙ୍କ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ଝାରଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ନିଜକୁ କ୍ୱାରେଣ୍ଟାନ କରିଛନ୍ତି। ମୁଖ୍ୟମନ୍ତ୍ରୀଙ୍କ ବାସଭବନକୁ ପ୍ରବେଶ ନିଷେଦ୍ଧ।
ମଙ୍ଗଳବାର କରୋନାରେ ଆକ୍ରାନ୍ତ ହୋଇଥିବା ମନ୍ତ୍ରୀ ମିଥଲେଶ ଠାକୁରଙ୍କ ସଂସ୍ପର୍ଶରେ ମୁଖ୍ୟମନ୍ତ୍ରୀ ଆସିଥିଲେ। ତେଣୁ ସେ ଏଭଳି ପଦକ୍ଷେପ ଗ୍ରହଣ କରିଛନ୍ତି। ସିଏମଓ କାର୍ଯ୍ୟାଳୟରେ ଥିବା କର୍ମଚାରୀମାନଙ୍କୁ ମଧ୍ୟ ମୁଖ୍ୟମନ୍ତ୍ରୀ କ୍ୱାରେଣ୍ଟାଇନରେ ରହିବାକୁ କହିଛନ୍ତି।
ଅନ୍ୟପକ୍ଷରେ ହେମନ୍ତ ସୋରେନଙ୍କର କରୋନା ଟେଷ୍ଟ ମଧ୍ୟ କରାଯିବ ବୋଲି ଜଣାପଡ଼ିଛି। ଏଥିପାଇଁ ଖୁବଶୀଘ୍ର ନମୁନା ସଂଗ୍ରହ କରାଯିବ। ମଙ୍ଗଳବାର ମନ୍ତ୍ରୀ ଠାକୁରଙ୍କ ସହ ଜେଏମଏମର ବିଧାୟକ ମାଥୁର ମାହୋତା ବି କରୋନାରେ ଆକ୍ରାନ୍ତ ହୋଇଥିଲେ।