ଗୁଆହାଟୀ: ବିଜେପି ରାଷ୍ଟ୍ରୀୟ ସାଧାରଣ ସମ୍ପାଦକ ରାମ ମାଧବ ରବିବାର କହିଛନ୍ତି କଂଗ୍ରେସର ସୋଶାଲ ମିଡିଆ ପାକିସ୍ତାନରେ ବେଶି ଲୋକପ୍ରିୟ। ଏପରିକି କଂଗ୍ରେସ ପାକିସ୍ତାନରେ ଯଦି ନିର୍ବାଚନ ଲଢ଼େ ଏହି ଦଳ ମିଛକୁ ନେଇ ଲଢ଼ୁଥିବାରୁ ସେଠାରେ ଆରାମରେ ନିର୍ବାଚନ ଜିତିଯିବ। କଂଗ୍ରେସ ନେତାଙ୍କ ମନ୍ତବ୍ୟ ଭାରତୀୟଙ୍କ ତୁଳନାରେ ପାକିସ୍ତାନୀଙ୍କ ଦ୍ୱାରା ବେଶି ରିଟ୍ୱିଟ୍ ହୋଇଥାଏ।
ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି, “କଂଗ୍ରେସ ନେତାଙ୍କ ମତ ମନ୍ତବ୍ୟ ପଡ଼ୋଶୀ ପାକିସ୍ତାନୀଙ୍କୁ ଏତେ ଭଲ ଲାଗୁଛି ଯେ ଆମ ଦେଶ ଅପେକ୍ଷା ସେମାନେ ଅଧିକ ଶେୟାର କରୁଛନ୍ତି। ଆମ ପ୍ରମୁଖ ବିରୋଧୀ ଦଳର ସ୍ଥିତି ଏମିତି ଯେ ଏହା ପାକିସ୍ତାନରେ ନିର୍ବାଚନ ଲଢ଼ିଲେ ମଧ୍ୟ ଜିତିଯିବ।”
ସେ କହିଛନ୍ତି, କଂଗ୍ରେସ ପାଖରେ କିଛି ପ୍ରସଙ୍ଗ ନଥିଲେ ସେମାନେ ଆମ ବିରୋଧରେ ମିଛ ପ୍ରଚାର କରନ୍ତି। ବର୍ତ୍ତମାନ କେହି ବୁଝିପାରୁନାହାନ୍ତି କଂଗ୍ରେସ କହିବାକୁ କ’ଣ ଚାହୁଁଛି ଏବଂ ଏହା ଦେଶକୁ କେଉଁ ଦିଗରେ ନେଇଯିବାକୁ ଚାହୁଁଛନ୍ତି।