ନୂଆଦିଲ୍ଲୀ: କେନ୍ଦ୍ରମନ୍ତ୍ରୀ ତଥା ବିଜେପି ନେତ୍ରୀ ମାନେକା ଗାନ୍ଧି ଆସନ୍ତା ନିର୍ବାଚନ ପାଇଁ ଆଜି ପ୍ରାର୍ଥିପତ୍ର ଦାଖଲ କରିଛନ୍ତି। ସେ ଗତଥର ଉତ୍ତର ପ୍ରଦେଶର ପିଲିଭିଟ୍ରୁ ପ୍ରାର୍ଥୀ ହୋଇଥିବା ବେଳେ ଏଥର କିନ୍ତୁ ବିଜେପି ତାଙ୍କୁ ସୁଲତାନପୁରରୁ ଟିକେଟ୍ ଦେଇଛି। ଆଜି ପ୍ରାର୍ଥିପତ୍ର ଦାଖଲ ପୂର୍ବରୁ ମାନେକା ଗାନ୍ଧି ଦଳୀୟ ସମର୍ଥକଙ୍କ ସହ ଏକ ବିଶାଳ ରୋଡ୍ ଶୋ’ କରିଥିଲେ।
ମାନେକା କହିଛନ୍ତି, “ମୁଁ ନିର୍ବାଚିତ ହେଲେ ସୁଲତାନପୁରରେ ବିକାଶମୂଳକ କାର୍ଯ୍ୟ ଆଗକୁ ବଢ଼ିବ। ମୁଁ ମୋର ପୂର୍ବ ନିର୍ବାଚନ ମଣ୍ଡଳୀରେ ଯେଉଁଭଳି ଭାବେ ବିକାଶମୂଳକ କାର୍ଯ୍ୟ କରିଥିଲି, ଏଠାରେ ମଧ୍ୟ ସମାନ କାର୍ଯ୍ୟ କରିବି। ମୋଦିଙ୍କ ବିକାଶମୂଳକ କାର୍ଯ୍ୟକ୍ରମ ଯୋଗୁ ବିଜେପି ପୁଣି ଜିତିବ ଓ ସରକାର ଗଠନ କରିବ।”
ମାନେକାଙ୍କ ପିଲିଭିଟ୍ ଆସନରୁ ଏଥର ଦଳ ତାଙ୍କ ପୁଅ ବରୁଣ ଗାନ୍ଧିଙ୍କୁ ପ୍ରାର୍ଥୀ କରିଛି।