ମଦ ସମ୍ରାଟ ବିଜୟ ମାଲ୍ୟାଙ୍କ ପାଇଁ ଅଡ଼ୁଆ ବଢିଲା। ଜର୍ମାନର ହାମବର୍ଗରେ ଆୟୋଜିତ ଜି-୨୦ ସମ୍ମିଳନୀର ଦ୍ୱିତୀୟ ଦିନରେ ବ୍ରିଟେନ ପ୍ରଧାନମନ୍ତ୍ରୀ ଟେରେସା ମେ’ଙ୍କ ସହ ଦ୍ୱିପାକ୍ଷିକ ଆଲୋଚନା କରିଛନ୍ତି ନରେନ୍ଦ୍ର ମୋଦି। ଏହି ଆଲୋଚନାରେ ପଳାତକ ମାଲ୍ୟାଙ୍କୁ ଭାରତକୁ ପ୍ରର୍ତ୍ୟପଣ କରିବାକୁ ଟେରେସା ମେ’ଙ୍କୁ ଅନୁରୋଧ କରିଛନ୍ତି ନରେନ୍ଦ୍ର ମୋଦି। ବିଦେଶ ମନ୍ତ୍ରଣାଳାୟ ପକ୍ଷରୁ ଟ୍ୱିଟ୍ ଦ୍ୱାରା ଏହାର ସୂଚନା ଦିଆଯାଇଛି।
ଦେବାଳିଆ କିଙ୍ଗଫିଶର ଏୟାରଲାଇନ୍ସକୁ ପୁର୍ନରୁଦ୍ଧାର କରିବା ପାଇଁ ଦେଶର ୧୭ଟି ବ୍ୟାଙ୍କରୁ ୯ ହଜାର କୋଟି ଟଙ୍କାର ଋଣ ନେଇଥିଲେ ମାଲ୍ୟା। ହେଲେ ଧାର୍ଯ୍ୟ ସମୟସୀମା ମଧ୍ୟରେ ଋଣ ସୁଝି ନଥିଲେ ମାଲ୍ୟା। ତେଣୁ ବ୍ୟାଙ୍କସବୁ ଏକଜୁଟ ହୋଇଥିଲେ ଓ ମାଲ୍ୟା ଯେପରି ଦେଶ ବାହାରକୁ ନ ଯାଆନ୍ତି ସେଥିନେଇ ୨୦୧୬ରେ ସୁପ୍ରିମକୋର୍ଟରେ ଅପିଲ୍ କରିଥିଲେ। ହେଲେ କୋର୍ଟ ରାୟ ଦେବା ପୂର୍ବରୁ ପଳାତକ ସାଜି ଲଣ୍ଡନ ଚାଲିଯାଇଥିଲେ ମାଲ୍ୟା। ବ୍ରିଟେନରୁ ମାଲ୍ୟାଙ୍କୁ ଭାରତ ଆଣିବାକୁ ପୂର୍ବରୁ ଅନେକ ଥର ଚେଷ୍ଟା କରାଗଲାଣି, କିନ୍ତୁ ମାଲ୍ୟାଙ୍କୁ ଭାରତ ଆଣିବା ସମ୍ଭବପର ହେଉନାହିଁ। ମାଲ୍ୟାଙ୍କ ପ୍ରର୍ତ୍ୟପଣ ମାମଲା ଏବେ ବ୍ରିଟେନ କୋର୍ଟରେ ବିଚରାଧୀନ ରହିଛି। ତେବେ ଏହି ଆଲୋଚନା ପରେ ମାଲ୍ୟାଙ୍କୁ ଭାରତ ଆଣିବା ପାଇଁ ଆଶା ସଂଚାର ହୋଇଛି।