ମୁମ୍ବାଇ: ମହାମାରୀ କରୋନାରେ ଆକ୍ରାନ୍ତ ହୋଇ ଆଜି ମୁମ୍ବାଇ ପୁଲିସର ଜଣେ ହେଡ କନଷ୍ଟେବଲ ଆଖିବୁଜିଛନ୍ତି। ସେ କରୋନାରେ ଆକ୍ରାନ୍ତ ହେବା ପରେ ହସ୍ପିଟାଲରେ ଚିକିତ୍ସିତ ହେଉଥିଲେ। ମୃତ ହେଡ କନଷ୍ଟେବଲଙ୍କ ନାଁ ଶିବାଜୀ ସୋନୱାନେ। ସେ କୁର୍ଲା ଟ୍ରାଫିକ ଡିଭିଜନରେ କାର୍ଯ୍ୟ କରୁଥିଲେ।
କୁର୍ଲା ଡିଭିଜନର ଏଲ-ୱାର୍ଡରେ କାର୍ଯ୍ୟରତ ଥିବା ବେଳେ ଶିବାଜୀ କରୋନାରେ ଆକ୍ରାନ୍ତ ହୋଇଥିଲେ। ଏହି ଏଲ-ୱାର୍ଡ ହେଉଛି କରୋନାର ହଟସ୍ପଟ। ଶିବାଜୀଙ୍କ ପୂର୍ବରୁ ମୁମ୍ବାଇ ପୁଲିସର ଆଉ ଦୁଇ ଜଣ କନଷ୍ଟେବଲ କରୋନାରେ ଆକ୍ରାନ୍ତ ହୋଇ ଆଖି ବୁଜିଥିଲେ।
ମୁମ୍ବାଇ ପୁଲିସ ପକ୍ଷରୁ କୁହାଯାଇଛି ଯେ ଆମେ ଦୁଃଖର ସହ କହିବାକୁ ଚାହୁଁଛୁ ଯେ ହେଡ କନଷ୍ଟେବଲ ଶିବାଜୀ ନାରାୟାଣ ସୋନୱାନେ ଆଜି ଆମ ସମସ୍ତଙ୍କୁ ଛାଡ଼ି ଚାଲି ଯାଉଛନ୍ତି। ତାଙ୍କୁ ମାତ୍ର ୫୬ ବର୍ଷ ବୟସ ହୋଇଥିଲା ଓ ସେ ହସ୍ପିଟାଲରେ କରୋନା ସହ ଲଢ଼େଇ କରୁଥିଲେ। ତାଙ୍କ ଆତ୍ମାର ସଦଗତି କାମନା କରୁଛୁ। ଆମେ ସମସ୍ତେ ଶିବାଜୀଙ୍କ ପରିବାର ଲୋକଙ୍କ ସହ ରହିଛୁ।