ଚାରିପଟେ ଘେରି ରହିଥିଲେ ସିଂହ। ଆଗକୁ ଯିବାକୁ ବାଟ ମଧ୍ୟ ନଥିଲା। କିନ୍ତୁ ସିଂହଙ୍କ ମେଳରେ ଜନ୍ମ ନେଇଥିଲା ଶିଶୁଟିଏ। ଏପରି ଦୃଶ୍ୟ ହୁଏତ ଆପଣ ଫିଲ୍ମରେ ଦେଖିଥିବେ। କିନ୍ତୁ ଏଭଳି ଘଟଣା ବାସ୍ତବରେ ଘଟିଛି ଗୁଜରାଟରେ।
ବୁଧବାର ଅମରେଲୀର ଲଂସୁପୁରା ଗାଁରୁ ଜଣେ ଗର୍ଭବତୀ ମହିଳାଙ୍କୁ ନେଇ ଡାକ୍ତରଖାନା ଅଭିମୁଖେ ଯାଉଥିଲା ୧୦୮ ଆମ୍ବୁଲାନ୍ସ। କିନ୍ତୁ ଗାଁ ଠାରୁ ପ୍ରାୟ ୩ କିଲୋମିଟର ଯିବା ପରେ ୧୦ରୁ ୧୨ଟି ସିଂହ ହଠାତ୍ ଦଳବଳ ହୋଇ ରାସ୍ତା ଉପରକୁ ଚଢି ଆସି ଆମ୍ବୁଲାନ୍ସକୁ ଚାରିପଟରୁ ଘେରି ଯାଇଥିଲେ। ବହୁ ସମୟ ଧରି ଆମ୍ବୁଲାନ୍ସକୁ ବାଟ ଛାଡିନଥିଲେ ସିଂହ ଦଳ। ସମୟ ବଢିବା ସଙ୍ଗେ ସଙ୍ଗେ ମହିଳାଙ୍କ ପ୍ରସବ ବେଦନା ମଧ୍ୟ ବଢି ଚାଲିଥିଲା। କିନ୍ତୁ ରାସ୍ତା ଉପରୁ ହଟିବାର ନାଁ ନେଉ ନଥିଲା ସିଂହ ଦଳ। ମହିଳାଙ୍କ ପ୍ରସବ ବେଦନା ଦେଖି ଆମ୍ବୁଲାନ୍ସରେ ଥିବା କର୍ମଚାରୀ ଆମ୍ବୁଲାନ୍ସ ଭିତରେ ପ୍ରସବ କରାଇବାକୁ ନିଷ୍ପତି ନେଇଥିଲେ। ଫୋନରେ ଡାକ୍ତରଙ୍କ ସୂଚନା ଆଧାରରେ ପ୍ରାୟ ୨୫ ମିନିଟ୍ ମଧ୍ୟରେ ପ୍ରସବ କରିବାରେ ସଫଳ ହୋଇଥିଲେ।