ନୂଆଦିଲ୍ଲୀ: ଉତ୍ତର ଭାରତରେ ନଡ଼ା ପୋଡ଼ି ଚିନ୍ତାର ବିଷୟ ପାଲଟିଛି। ଦିଲ୍ଲୀ-ଏନସିଆରରେ ବଢ଼ୁଥିବା ପ୍ରଦୂଷଣ ଏବେ ସବୁଠୁ ବଡ଼ ଚ୍ୟାଲେଞ୍ଜ ପାଲଟିଛି। ପଞ୍ଜାବ ଏବଂ ହରିଆଣାରେ ନଡ଼ା ପୋଡ଼ିବାରୁ ଏହାର ପ୍ରଭାବ ରାଜଧାନୀ ଦିଲ୍ଲୀରେ ପଡ଼ୁଛି।
ଏବେ ସୁପ୍ରିମକୋର୍ଟ ଏହି ମାମଲାକୁ ଗୁରୁତର ସହ ନେଇ ଏକ କମିଟି ଗଠନ କରିଛନ୍ତି। ଏଥିପାଇଁ ସୁପ୍ରିମକୋର୍ଟ ପୂର୍ବତନ ବିଚାରପତି ଜଷ୍ଟିସ ମଦନ ଲୋକୁରଙ୍କୁ ନିୟୋଜିତ କରିଛନ୍ତି। ସେ ଏକୁଟିଆ ଏହି ଘଟଣା ଉପରେ ନଜର ରଖିବେ ବୋଲି ପ୍ରଧାନ ବିଚାରପତି ଜଷ୍ଟିସ ଏସଏ ବୋବଡେ କହିଛନ୍ତି।
ଜଷ୍ଟିସ ଲୋକୁର ଏବେ ଉତ୍ତର ଭାରତର ଏହି ଦୁଇ ରାଜ୍ୟର ମୁଖ୍ୟ ଶାସନ ସଚିବଙ୍କୁ ଏ ସଂକ୍ରାନ୍ତରେ ରିପୋର୍ଟ ମାଗିବେ। ଏଥିସହ ପ୍ରଦୂଷଣ ରୋକିବା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରିବେ।
ଏଥିସହ ନଡ଼ା ପୋଡ଼ି ଉପରେ ନଜର ରଖିବା ପାଇଁ ନ୍ୟାଶନାଲ କେଡେଟ୍ କୋର୍ (ଏନସିସି), ଏନଏସଏସ, ଭାରତ ସ୍କାଉଟ୍ ଏବଂ ଗାଇଡର ପ୍ରମୁଖଙ୍କୁ ଜଷ୍ଟିସ ଲୋକୁରଙ୍କୁ ସହଯୋଗ କରିବା ପାଇଁ ପ୍ରଧାନ ବିଚାରପତି ନିର୍ଦ୍ଦେଶ ଦେଇଛନ୍ତି।