ଚେନ୍ନାଇ: ଦିବଂଗତ ଡିଏମକେ ମୁଖ୍ୟ ଏମ କରୁଣାନିଧିଙ୍କ ସାନପୁଅ ଏମକେ ଷ୍ଟାଲିନ୍ ବିନା ବାଧାରେ ଆଜି ଦଳର ସଭାପତି ଭାବେ ନିର୍ବାଚିତ ହୋଇଛନ୍ତି। ପ୍ରାୟ ୫୦ ବର୍ଷ ଧରି ଏହି ପଦରେ ତାଙ୍କ ପିତା ଏମ କରୁଣାନିଧି ଅଧିଷ୍ଠିତ ଥିଲେ।
କରୁଣାନିଧି ୧୯୬୯ରେ ଡିଏମକେ ସଭାପତି ହୋଇଥିଲେ। ତାଙ୍କ ମୃତ୍ୟୁ ପରେ ଏହି ପଦବୀ ଖାଲି ପଡ଼ିଥିଲା। ଆଜି ଦଳର ସାଧାରଣ ପରିଷଦ ବୈଠକରେ ଡିଏମକେ ସଭାପତି ପଦ ପାଇଁ ନିର୍ବାଚନ ହୋଇଥିଲା। ଷ୍ଟାଲିନ୍ଙ୍କ ପାଇଁ ୧୩୦୭ ନାମାଙ୍କନ ଦାଖଲ ହୋଇଥିବା ବେଳେ ତାଙ୍କ ବିରୋଧରେ କେହି ବି ପ୍ରାର୍ଥୀ ହୋଇ ନଥିଲେ।
ଯେହେତୁ ଷ୍ଟାଲିନ୍ଙ୍କ ବିରୋଧରେ କେହି ପ୍ରାର୍ଥୀ ହୋଇ ନଥିଲେ, ତେଣୁ ସେ ନିର୍ଦ୍ୱନ୍ଦ୍ୱରେ ଦଳର ସଭାପତି ହୋଇଛନ୍ତି ବୋଲି ଡିଏମକେ ସାଧାରଣ ସମ୍ପାଦକ କେ ଅନଭାଝାଗନ ସୂଚନା ଦେଇଛନ୍ତି।
ସେହିପରି ବରିଷ୍ଠ ଡିଏମକେ ନେତା ଏସ୍ ଦୁରାଇମୁରଗାନ୍ ଡିଏମକେର କୋଷାଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି।
ଏହା ପୂର୍ବରୁ କରୁଣାନିଧିଙ୍କ ବଡ଼ ପୁଅ ଏମକେ ଆଲାଗିରି ଡିଏମକେ ସଭାପତି ହେବାକୁ ଇଚ୍ଛା ପ୍ରକାଶ କରିଥିଲେ। ସେ କହିଥିଲେ ଦଳର ପୁରୁଖା ନେତା ଓ କର୍ମୀ ତାଙ୍କୁ ସମର୍ଥନ କରୁଛନ୍ତି। ଏହାକୁ ନେଇ ଦୁଇ ଭାଇଙ୍କ ମଧ୍ୟରେ ବାକ୍ଯୁଦ୍ଧ ଦେଖିବାକୁ ମିଳିଥିଲା।
ଷ୍ଟାଲିନ ନିର୍ବାଚିତ ଘୋଷିତ ହେବା ପରେ ଡିଏମକେ ଅଫିସରେ ଉତ୍ସବର ବାତାବରଣ ସୃଷ୍ଟି ହୋଇଥିଲା। ତେବେ ଆଲାଗିରି ଓ ତାଙ୍କ ସମର୍ଥକ ଷ୍ଟାଲିନ ନିର୍ବାଚିତ ହେବା ଘଟଣାରେ ଅସନ୍ତୁଷ୍ଟ ଥିବା ଜଣାପଡ଼ିଛି।
ଭବିଷ୍ୟତରେ ଆଲାଗିରି ତାଙ୍କ ସାନଭାଇ ଷ୍ଟାଲିନ ପାଇଁ ଆହ୍ଵାନମୂଳକ ପରିସ୍ଥିତି ସୃଷ୍ଟି କରିବାକୁ ଉଦ୍ୟମ କରିବାର ଯଥେଷ୍ଟ ସମ୍ଭାବନା ରହିଥିବା କୁହାଯାଉଛି। ତେବେ ପୂର୍ବରୁ କରୁଣାନିଧି ଆଲାଗିରୀଙ୍କୁ ଦଳରୁ ବହିଷ୍କାର କରିବା ସଙ୍ଗେସଙ୍ଗେ ଷ୍ଟାଲିନ ତାଙ୍କର ଉତ୍ତରାଧିକାରୀ ବୋଲି ସ୍ପଷ୍ଟ ସୂଚନା ଦେଇଥିବାରୁ ଦଳର ନେତା ଓ କର୍ମୀ ତାଙ୍କୁ ହିଁ ସଭାପତି ଭାବେ ଦେଖିବାକୁ ଚାହୁଁଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
