କାନ୍ଦାହାର (ଓଡ଼ିଶା ରିପୋର୍ଟର): ଆଫଗାନିସ୍ତାନରେ ଏକ ବଡ଼ ଧରଣର ତାଲିବାନୀ ଆକ୍ରମଣରେ କାନ୍ଦାହାର ପ୍ରଦେଶ ପ୍ରଶାସନର ୩ ଜଣ ମୁଖ୍ୟ ପଦାଧିକାରୀ ପ୍ରାଣ ହରାଇଛନ୍ତି। ଅନ୍ୟପକ୍ଷରେ ଆମେରିକୀୟ କମାଣ୍ଡର ଜେନେରାଲ ଏସ୍ ମିଲର ବର୍ତ୍ତମାନ ପର୍ଯ୍ୟନ୍ତ ନିଖୋଜ ଅଛନ୍ତି।
କାନ୍ଦାହାର ସହରରେ ହୋଇଥିବା ଏହି ଆକ୍ରମଣରେ ରାଜ୍ୟର ପୁଲିସ୍ ମୁଖ୍ୟ ଜେନେରାଲ ଅବ୍ଦୁଲ ରଜିକ୍, ରାଜ୍ୟପାଳ ଏବଂ ଗୁଇନ୍ଦା ମୁଖ୍ୟଙ୍କୁ ହତ୍ୟା କରାଯାଇଛି ଏବଂ ଦୁଇ ଆମେରିକୀୟ ସୁରକ୍ଷାକର୍ମୀ ଗୁରୁତର ଆହତ ହୋଇଛନ୍ତି। ଏନେଇ କାନ୍ଦାହାର ଉପରାଜ୍ୟପାଳ ଆଘା ଲାଲେଡାଟାଗିରି କହିଛନ୍ତି, ତାଲିବାନ ଆତଙ୍କବାଦୀଙ୍କ ଆକ୍ରମଣରେ ଜେନେରାଲ ରଜିକ୍, ରାଜ୍ୟପାଳ ଜଲାମୀ ୱେସା ଏବଂ ଗୁଇନ୍ଦା ମୁଖ୍ୟ ଜେନେରାଲ ଅବ୍ଦୁଲ ମୋମିନ୍ଙ୍କ ମୃତ୍ୟୁ ହୋଇଛି।
ଏହି ଆକ୍ରମଣରେ ଜଣେ କିମ୍ବା ଏକାଧିକ ବନ୍ଧୁକଧାରୀ ଆତଙ୍କବାଦୀ ସମ୍ପୃକ୍ତ ଥିଲେ, ସେ ନେଇ କୌଣସି ସ୍ପଷ୍ଟ ସୂଚନା ନାହିଁ। ଅନ୍ୟପକ୍ଷରେ ଅନ୍ୟ ଏକ ସୂତ୍ରରୁ ଜଣାଯାଉଛି ଯେ, ଆଫଗାନିସ୍ତାନର ବରିଷ୍ଠ ଅଧିକାରୀ ଏବଂ ଆମେରିକାର ସେନା ଅଧିକାରୀଙ୍କ ମଧ୍ୟରେ ହେଉଥିବା ଏହି ବୈଠକରେ ଅଙ୍ଗରକ୍ଷୀମାନେ ଗୁଳିଚାଳନା କରିଥିଲେ।