ଥାନେ କାରଖାନା ବିସ୍ଫୋରଣ ଘଟଣା: ମୃତକଙ୍କ ସଂଖ୍ୟା ୧୨କୁ ବୃଦ୍ଧି

ମୁମ୍ବାଇ: ମହାରାଷ୍ଟ୍ରର ଥାନେ ଜିଲ୍ଲା ଅନ୍ତର୍ଗତ ଦୋମ୍ବିଭିରେ ଗୁରୁବାର ଏକ ଫ୍ୟାକ୍ଟ୍ରିରେ ବିସ୍ଫୋରଣ ଘଟଣାରେ ମୃତକଙ୍କ ସଂଖ୍ୟା ୧୨କୁ ବୃଦ୍ଧି ପାଇଛି। ଆଜି ଧ୍ୱସ୍ତ ଫ୍ୟାକ୍ଟ୍ରି ତଳୁ ଆଉ ଏକ ମୃତଦେହ ଉଦ୍ଧାର କରାଯିବା ସହ ମୃତକଙ୍କ ସଂଖ୍ୟା ୧୨କୁ ବୃଦ୍ଧି ପାଇଛି।

ଏନ୍‌ଡିଆର୍‌ଏଫ୍‌ର ଜଣେ ବରିଷ୍ଠ ଅଧିକାରୀ କହିଛନ୍ତି,“ଗତକାଲି ପର୍ଯ୍ୟନ୍ତ ଏହି ଘଟଣାର ମୃତକଙ୍କ ସଂଖ୍ୟା ୧୧ ଥିଲା। ଗୁରୁବାର ୬ଟି ମୃତଦେହ ଉଦ୍ଧାର କରାଯାଇଥିଲା। ଗତକାଲି ଆଉ ୪ଟି ମୃତଦେହ ଜବତ କରାଯାଇଥିଲା। ଗତକାଲି ଚିକିତ୍ସାଧୀନ ଅବସ୍ଥାରେ ଜଣଙ୍କ ମୃତ୍ୟୁ ଘଟିଥିଲା। ଆଜି ସକାଳେ ଘଟଣାସ୍ଥଳରୁ ଆଉ ଏକ ଶବ ଉଦ୍ଧାର କରାଯାଇଛି।’

ଗୁରୁବାର ଘଟିଥିବା ଏହି ବିସ୍ଫୋରଣରେ ପୂରା ଦୋମ୍ବିଭି ଥରି ଉଠିଥିଲା। ଫ୍ୟାକ୍ଟ୍ରିଠାରୁ ଦୁଇ କିଲୋମିଟର ଦୂରରେ ଥିବା ୬୦୦ରୁ ଅଧିକ ଘର, ଅଫିସ୍ ଓ ଦୋକାନ ଘର ଏହି ବିସ୍ଫୋରଣ ଯୋଗୁଁ ପ୍ରଭାବିତ ହୋଇଛି।

ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାଭିସ୍ ଘଟଣାସ୍ଥଳ ପରିଦର୍ଶନ କରିବା ସହିତ ତଦନ୍ତ ନିର୍ଦ୍ଦେଶ ଦେଇଛନ୍ତି।