ଜାଗର ଯାତ୍ରାରେ ସରବତ ପିଇ ୧୦୦ ଅସୁସ୍ଥ

ସାଲେପୁର(ଓଡ଼ିଶା ରିପୋର୍ଟର): ସରବତ ପିଇ ଗୋଟିଏ ଗାଁର ୧୦୦ ଜଣ ଲୋକ ଅସୁସ୍ଥ ହୋଇପଡ଼ିଛନ୍ତି। ଏହି ଅଭାବନୀୟ ଘଟଣା ଘଟିଛି ସାଲେପୁର ଅନ୍ତର୍ଗତ ରାଇସୁଙ୍ଗୁଡା ଗାଁରେ।

ଗତକାଲି ଗାଁର ସ୍ୱପ୍ନେଶ୍ୱର ମନ୍ଦିରରେ ଜାଗର ଯାତ୍ରା ଅନୁଷ୍ଠିତ ହୋଇଥିଲା। ମହାଦୀପ ଉଠିବା ପରେ ଶ୍ରଦ୍ଧାଳୁମାନେ ଯାତ୍ରାରେ ବିକ୍ରି ହେଉଥିବା ସରବତ ପିଇଥିଲେ। ସରବତ ପିଇବାର କିଛି ସମୟ ପରେ ସେମାନେ ହଠାତ୍‌ ଅସୁସ୍ଥ ହୋଇ ପଡ଼ିଥିଲେ। ରାତିରେ ଝାଡାବାନ୍ତି ହେବାରୁ ସେମାନଙ୍କୁ ମାହାଙ୍ଗା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା।

ସରବତ ପିଇ ଅସୁସ୍ଥ ହୋଇପଡ଼ିଥିବା ସାବିତ୍ରୀ ବେହେରା କହିଛନ୍ତି,“ଗତକାଲି ମହାଶିବରାତ୍ରି ଥିବାରୁ ମନ୍ଦିରକୁ ଯାଇଥିଲୁ। ଠାକୁର ଦର୍ଶନ ପରେ ସରପତ ପିଇ ଘରକୁ ଫେରୁଲୁ। ରାତି ୩ଟା ବେଳେ ପେଟ କାଟିଥିଲା। ତାପରେ ବାନ୍ତି ହୋଇଥିଲା।”

ଚିକିତ୍ସା କରୁଥିବା ଡାକ୍ତର କହିଛନ୍ତି,“ ଜାଗର ଯାତ୍ରାରେ ବିକ୍ରି ହେଉଥିବା ସରବତ ପିଇ କିଛି ଲୋକଙ୍କ ବିଷ କ୍ରିୟା ହୋଇଛି। ସାଲେପୁର ଡାକ୍ତରଖାନାରେ ପ୍ରାୟ ୨୦ ଜଣ ଭର୍ତ୍ତି ହୋଇଥିବା ବେଳେ ମାହାଙ୍ଗାରେ ମଧ୍ୟ ୨୦ ଜଣ ଚିକିତ୍ସିତ ହେଉଛନ୍ତି।  ରାଇସୁଗୁଡା ଉପ ସ୍ୱାସ୍ଥ୍ୟ କେନ୍ଦ୍ରରେ ୩୦ରୁ ୪୦ ଜଣ ରୋଗୀ ଅଛନ୍ତି। ପ୍ରାଥମିକ ଚିକିତ୍ସା ପରେ ସମସ୍ତେ ଭଲ ହୋଇଯିବେ।”