ହାତୀ ପଲ ସହ ଯାଉଥିବା ବେଳେ କେନାଲ୍ ଭିତରକୁ ଖସି ପଡ଼ିଲେ ୨ ଶାବକ

କେନ୍ଦୁଝର(ପ୍ରଣୟ ପାଣି): କେନ୍ଦୁଝର ଜିଲ୍ଲା ଚମ୍ପୁଆ ରେଞ୍ଜ୍  ଅଧୀନ କାନପୁର ଡ୍ୟାମ୍‌ ଶାଖା କେନାଲ୍ ଭିତରକୁ ଗତ ରାତିରେ ଖସିପଡ଼ିଥିବା ୨ ହାତୀ ଶାବକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ୨  ଘଣ୍ଟାର  ଅପରେସନ୍ ପରେ ମା’ ହାତୀଙ୍କ ସହାୟତାରେ ହାତୀ ଶାବକ ଦ୍ୱୟ କେନାଲ୍ ଭିତରୁ ବାହାରିବାରେ ସକ୍ଷମ ହୋଇଥିଲେ । ଏବେ  ହାତୀପଲ ମୁକୁନ୍ଦପୁର  ଜଙ୍ଗଲରେ ଥିବା ଜଣାପଡ଼ିଛି ।

ଗତକାଲି ବିଳମ୍ବିତ ରାତିରେ ଏକ ୨୨ ଟିକିଆ ହାତୀପଲ ବୈତରଣୀ ନଦୀ ପଟରୁ  ଜାମୁଦଲକ ପଟକୁ  ଆସୁଥିଲେ। ଏହି ସମୟରେ କେନାଲ ପୁନରୁଦ୍ଧାର କାମ ଚାଲିଥିବାରୁ ୨ଟି ହାତୀ ଶାବକ କେନାଲ୍ ଭିତରକୁ ଖସିପଡ଼ିଥିଲେ । କେନାଲର ଗଭୀର ପାଖାପାଖି ୪ ଫୁଟରୁ ଅଧିକ ଥିବାରୁ ହାତୀପଲ ବହୁ ଚେଷ୍ଟା ପରେ ବି ଶାବକଙ୍କୁ ଉଦ୍ଧାର କରିପାରି ନଥିଲେ । ତେବେ ଏହି ଘଟଣାର କିଛି ସମୟ ମଧ୍ୟରେ ୧୭ ଟି ହାତୀ ସେଠାରୁ ଚାଲିଯାଇଥିଲେ। ମାତ୍ର ୩ ମାଈ ହାତୀ ୨ ଶାବକଙ୍କୁ ଜଗି ରହିଥିଲେ ।

ହାତୀପଲଙ୍କ ଚିତ୍କାର ଶୁଣି ଗ୍ରାମବାସୀ ଏ ସମ୍ପର୍କରେ ବନ ବିଭାଗକୁ ଖବର ଦେଇଥିଲେ।   ଖବର ପାଇ ଚମ୍ପୁଆ ରେଞ୍ଜର ଘାସିନାଥ ପାତ୍ର ଅନ୍ୟ ବନକର୍ମଚାରୀଙ୍କ ସହ ଘଟଣାସ୍ଥଳରେ  ପହଞ୍ଚିଥିଲେ।  ଏହାପରେ ହାତୀ ଶାବକଙ୍କୁ ଉଦ୍ଧାର କରିବା ପାଇଁ  ଆରମ୍ଭ ହୋଇଥିଲା ଅପରେସନ। ହାତୀ  ସ୍କ୍ୱାର୍ଡ  ଏବଂ ଅଗ୍ନିଶମ ବିଭାଗର ସହାୟତା ନେଇଥିଲା ବନ ବିଭାଗ । ଜେସିବି ମେସିନ୍  ଦ୍ୱାରା ହାତୀ ଶାବକଙ୍କ ବାହାରିବା ପାଇଁ ବାଟ କରାଯାଇଥିଲା । ଶେଷରେ ୨  ଘଣ୍ଟାର  ଅପରେସନ୍ ପରେ ମା’ ହାତୀଙ୍କ ସହାୟତାରେ ହାତୀ ଶାବକ ଦ୍ୱୟ କେନାଲ୍ ଭିତରୁ ବାହାରିବାରେ ସକ୍ଷମ ହୋଇଥିଲେ । ଏବେ ଏହି ହାତୀପଲ ମୁକୁନ୍ଦପୁର  ଜଙ୍ଗଲରେ ଥିବା ଜଣାପଡ଼ିଛି ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।