ବାରିପଦା(ମାଣିକ ଲାଲ ପାଣି): “୬ ଜଣ ଅଫିସରଙ୍କ ପାଇଁ ୩୦ ହଜାର ଦିଅ। ତମ ଗାଡ଼ି ସୁରୁଖୁରରେ ସୀମା ପାର୍ ହୋଇଯିବ । କେହି ଟେର ବି ପାଇବେନି।” ମୟୂରଭଞ୍ଜ ଜିଲ୍ଲା ଝାରପୋଖରିଆ ଥାନାର ଜଣେ ପୁଲିସ୍ ଅଧିକାରୀ ଓ ଜଣେ ଗୋରୁ ଦଲାଲଙ୍କ ବାର୍ତ୍ତାଳପର ଏପରି ଅଡିଓ ଏବେ ଭାଇରାଲ ହେବାରେ ଲାଗିଛି। ଫଳରେ ପଦାରେ ପଡ଼ିଛି ଗୋ’ଚାଲାଣ ରାକେଟରେ ପୁଲିସ୍ ଲିଙ୍କ । ଏପରି ଅଡିଓ ଭାଇରାଲ ହେବା ପରେ ମୟୂରଭଞ୍ଜ ଏସ୍ପି ଆକ୍ସନ ମୁଡ୍କୁ ଆସି ଝାରପୋଖରିଆ ଥାନାର ୩ ପୁଲିସ୍ କର୍ମଚାରୀଙ୍କୁ ନିଲମ୍ବନ କରିଛନ୍ତି ।
୩ ନିଲମ୍ବିତ କର୍ମଚାରୀଙ୍କ ମଧ୍ୟରେ ଦୁଇ ଜଣ ଏଏସଆଇ ଏବଂ ଜଣେ କନଷ୍ଟେବଳ ଥିବା ଜଣାଯାଇଛି ସେମାନେ ହେଲେ ଏଏସଆଇ ସ୍ମୃତି ରଂଜନ ସ୍ୱାଇଁ, ଚନ୍ଦନ ସିଂ ଏବଂ କନେଷ୍ଟବଳ ଦୀପକ କୁମାର ପାଲବାବୁ । ଏହି ୩ ଜଣଙ୍କୁ କାର୍ଯ୍ୟରେ ଅବହେଳା ପାଇଁ ନିଳମ୍ବିତ କରାଯାଇଥିବା ମୟୂରଭଞ୍ଜ ଜିଲ୍ଲା ଆଡିସନାଲ ଏସିପି ସୂଚନା ଦେଇଛନ୍ତି ।
ମିଳିଥିବା ସୂଚନା ଅନୁସାରେ, ନିଳମ୍ବିତ ପୁଲିସ୍ କର୍ମଚାରୀଙ୍କ ମଧ୍ୟରୁ ଜଣେ ଏଏସ୍ଆଇ ଗତ କିଛି ଦିନ ତଳେ ଜଣେ ଗୋରୁ ବେପାରୀଙ୍କ ସହ ଗୋରୁ ଚାଲାଣ ନେଇ ଡିଲ୍ କରୁଥିବାର ଅଡିଓ ଭାଇରାଲ ହୋଇଥିଲା । ଅଡିଓରେ ସଂପୃକ୍ତ ଏଏସ୍ଆଇଜଣଙ୍କ ଗୋରୁ ବୋଝେଇ ଗାଡ଼ିକୁ ଓଡ଼ିଶା ସୀମା ପାର କରାଇ ଦେବା ପାଇଁ ମୋଟା ଅଙ୍କର ଅର୍ଥ ଡିଲ୍ କରିଥିଲେ । ଏହି ଅର୍ଥ ସମୁଦାୟ ୬ ଜଣ ଅଧିକାରୀଙ୍କ ମଧ୍ୟରେ ଭାଗବଣ୍ଟା ହେବ । ଏହାପରେ ଗାଡ଼ି ସୁରଖୁରରେ ସୀମା କରି ପଳାଇ ଯାଇ ପାରିବ ବୋଲି ପୁଲିସ୍ ବାବୁଜଣକ ଦଲାଲଙ୍କୁ କହୁଥିବା ଭାଇରାଲ ଅଡିଓରେ ଶୁଣିବାକୁ ମିଳୁଛି।
ଏହି ଅଡିଓ ଭାଇରାଲ ହେବା ପରେ ମୟୂରଭଞ୍ଜ ଏସପି ଏହାର ତଦନ୍ତ ନିର୍ଦ୍ଦେଶ ଦେଇଥିଲେ । ରିପୋର୍ଟ ଆସିବା ପରେ ଏପରି ଦୃଢ କାର୍ଯ୍ୟାନୁଷ୍ଠାନ ନିଆଯାଇଛି। ଏବେ ସୁଦ୍ଧା ୩ ଜଣଙ୍କୁ ନିଲମ୍ବିତ କରାଯାଇଥିବା ବେଳେ ଭାଇରାଲ ଅଡିଓରେ କୁହାଯାଇଥିବା ଅନ୍ୟ ଅଧିକାରୀଙ୍କ ବିରୋଧରେ ବି ଯାଞ୍ଚ ହେବ । ଉପଯୁକ୍ତ ପ୍ରମାଣ ମିଳିଲେ ସେମାନଙ୍କ ବିରୋଧରେ ବି ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦେଇଛନ୍ତି ଏସ୍ପି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
