ଜେଜେ ମା’ ଆଣିଥିଲେ ଚଣା ଶାଗ, ଖାଇବା ପରେ ଆଖି ବୁଜିଲା ୩ ବର୍ଷର ଝିଅ

ନୟାଗଡ଼(ଆର୍ତ୍ତତ୍ରାଣ ପ୍ରଧାନ) : ନୟାଗଡ଼ ଜିଲ୍ଲା ଶରଣକୂଳ ଥାନା ଅନ୍ତର୍ଗତ ବରସାହି ଗ୍ରାମରେ ଗତକାଲି ଏକ ଅଭାବନୀୟ ଘଟଣା ଘଟିଯାଇଛି । ବିଷାକ୍ତ ଶାଗ ଖାଇ ଗୋଟିଏ ପରିବାରର ଏକ ଶିଶୁର ମୃତ୍ୟୁ ଘଟିଥିବା ବେଳେ ୩ ଜଣ ଗୁରୁତର ହୋଇଛନ୍ତି । ମୃତ ଶିଶୁର ବୟସ ୩ ବର୍ଷ ହୋଇଥିବା ବେଳେ ସେ ରାକେଶ ମୁଦୁଲିଙ୍କ ଝିଅ ଟ୍ୟୁଙ୍କିଲ୍ ମୁଦୁଲି ବୋଲି ଜଣାଯାଇଛି ।

ସୂଚନାଅନୁଯାୟୀ, ଗତକାଲି ଟ୍ୟୁଙ୍କିଲଙ୍କ ଜେଜେ ମା’ ବାସନ୍ତି ଦେଇ ବିଲରୁ କିଛି ଚଣାଶାଗ ଆଣି ରୋଷେଇ କରିଥିଲେ । ଏହାକୁ ମଧ୍ୟାହ୍ନ ସମୟରେ ଟ୍ୟୁଙ୍କିଲ, ତାଙ୍କ ଜେଜେମା’ ବାସନ୍ତି, ମା’ ସୁରଥା ମୁଦୁଲି, ଆଇ ଝୁନୁ ଦେଇ ଖାଇଥିଲେ । ମାତ୍ର ଅପରାହ୍ନରେ  ବାନ୍ତି ହେବା ସହ ସମସ୍ତଙ୍କ ଅବସ୍ଥା ଗୁରୁତର ହୋଇପଡ଼ିଥିଲା। ଏହାପରେ ତୁରନ୍ତ ସେମାନଙ୍କୁ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା । ସେଠାରେ ଟ୍ୟୁଙ୍କିଲଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭୁବନେଶ୍ୱର ଏମ୍ସ ହସ୍ପିଟାଲ ସ୍ଥାନାନ୍ତର କରାଯାଉଥିଲା। ମାତ୍ର ବାଟରେ  ଝିଅଟି ଆଖି ବୁଜିଦେଇଥିଲା।

ଝିଅ ମୃତ୍ୟୁ ଖବର ପାଇ ପାଗଳିପ୍ରାୟ ହୋଇଯାଇଥିବା ସୁରଥା ଓ ତାଙ୍କ ମା’ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରୁ  ଘରକୁ ପଳାଇଥିବା ବେଳେ ବାସନ୍ତି ଚିକିତ୍ସାଧିନ ଥିବା ଜଣାଯାଇଛି ।।  ଏହି ଘଟଣା ଯୋଗୁ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।